Избор на нови модератори

Со цел позабрзано и поквалитетно развивање на форумот, отворено ги повикуваме оние кои се заинтересирани да придонесат во одржувањето и развивањето на најголемиот женски форум во Македонија да се кандидираат за функцијата модератор.

Ако имате желба да станете дел од модераторскиот тим на Форум Фемина, испратете лична порака на @Femina во која ќе напишете два-три збора за себе, зошто би сакале да станете модератор и колку време имате на располагање. Задолжително наведете 3 категории коишто би сакале да ги уредувате (подредени по приоритет). Потребно е да бидете активни во посочените категории и да придонесувате во разработувањето на темите, па изберете ги категориите кои ви будат најголем интерес.

Забелешка: Категории се Мода и стил, Лице, Тело, Коса, а НЕ Убавина и мода, Љубов и секс, Диети и фитнес (последниве се секции).

ВАЖНО: Исклучително ценета карактеристика кај модераторите е објективноста. Пред да се пријавите, добро размислете дали би можеле да бидете подеднакво фер со членовите кои ги сметате за свои „виртуелни пријатели“ и членовите кои „не ви лежат на срце“.

ЧПП

Каква функција има модераторот?
Модераторот треба да се грижи за почитувањето на правилата на форумот, да ги одржува своите категории организирани (со помош на спојување/преместување/бришење на теми и преместување/бришење/редактирање на мислења), како и да иницира нови дискусии.

До кога ќе трае конкурсот?
Конкурсот ќе трае до крајот на месецов, односно до 30 ноември (среда).

Како ќе знам што треба да правам?
Ако бидете избрани за модератор, ќе имате на располагање детални инструкции за модерирање, а ќе можете и да се консултирате со другите модератори при донесувањето на каква било одлука.

Не сум компјутерски експерт. Дали ќе можам да бидам модератор?
Ако немате проблеми со секојдневното користење на компјутер, уредувањето на форумот нема да ви претставува никаква тешкотија. Впрочем, уредувањето не е многу поразлично од партиципацијата во форумот. Едноставно ќе добиете дополнителни опции за преместување, заклучување и спојување на теми, за редактирање, преместување и бришење на мислења, ќе можете да испраќате опомени и сл.

Не знам дали ќе имам доволно време за да бидам модератор.
Ако сте редовен и активен посетител на форумот, тоа е сосема доволно за да бидете и модератор. Немате обврска да ги читате сите мислења, ниту пак сте задолжени да поминувате одредено време во уредување.

Дали модераторот може да пишува мислења?
Дали може да контактира со останатите членови? Да, секако дека може. Ако станете модератор, продолжувате да си го користите форумот на вообичаениот начин.

Дали модераторот треба да биде строг и груб кон останатите членови?
Не. Модераторите не смеат да пишуваат работи од типот: „Зошто ле си отворила ваква глупава тема овде?“, „Аман веќе од вакви како тебе!“, „Алоооо, не гледаш дека има веќе вакви теми?!?“, „Лелееее, уште не се научивте да пишувате на кирилица?“ и сл. Модераторите не треба да влегуваат во конфликт со членовите на форумот, туку напротив, треба да им помагаат да се вклопат и да бидат пријателски настроени кон нив.​

НАПОМЕНА: Ако се пријавите, тоа не значи дека автоматски ќе бидете поставени за модератор. Модераторите ќе бидат избирани според неколку критериуми, како бројот и квалитетот на нивните досегашни мислења, односот кон другите членови, времето поминувано на форумот итн. Кандидатурите ќе бидат од отворен тип, т.е. нема да ви одговараме дали и кога ќе бидете или нема да бидете примени за модератор. Едноставно ќе ве повикаме штом решиме дека е соодветен момент.

Ако имате какви било други прашања, слободно поставете ги во темава.

 

Сакале пари за да бидат модератори.
Кој виц на годината е ова, ме изнасмеавте.

Кај Фемина одвај модератори ќе стави, па и пари...лелеее, смешка.

 

Абе еден труд што треба да вложиш...сигурно нема да те тераат да правиш бизнис план или биланс на приходи и расходи.