Користење ВИ за пишување мислења на форум

Верувале или не, до сега AI немам ниту еднаш искористено за ништо.
А вие што пишувате мислења на форум со AI, сте прснале скроз. До толку да се закржлавите да не можете мислата да си ја напишете? Get a life, get a job, do something, опседнати сте со форумов.

 

Користење ВИ за да изразиш сопствено мислење или да дадеш совет ми е лудост. Таман работа до толку да дојдовме да не можиме да пишиме мислење без помош од ВИ. Имам забележано некои мислења во Љубовни проблеми пишани со Чат ГПТ. Сметам дека во овој случај треба да има предупредување од модератор, да се додаде во правилата на форумот за користењето ВИ.

Некогаш можеби треба да препровериш факт за нешто или да истражиш, тогаш не гледам проблем бидејќи и да изгуглаш првиот одговор ти е од ВИ. Тоа ми е исто како да си изгуглал и да го преземиш тоа од некоја страна, но фер е да се воведи дека е преземено од гугл или ВИ, не да го претставуваш како свое.

Никогаш не сум пишала тука сопствено мислење од Чат ГПТ, ниту планирам. Само доколку ми требало некој извор или нешто сум истражувала со негова помош, но тоа го имам наведувано. Не кријам дека го користам за разговори понекогаш, но тоа е претежно за и јас нешто да научам, во смисла како да си правам муабет со некој што знае сѐ (наводно). А не во замена за мои мисли или други личности.

ВИ можи да е добра алатка доколку се користи како што треба, но човековата природа е уште таква што повеќе штета би направиле со неа отколку корист.

 

Не мислам дека не можат да ја изразат мислата, туку сакаат да изгледаат попаметно употребувајќи комплексни реченици и зборови.

Дали сум против такви мислења? -Не, ништо не ми менува, тоа повеќе кажува за личноста.
А и лесно се препознава кога нешто е модифицирано со AI...засега. Па не ги ни читам тие мислења, нема што да губам време.

Додуша не знам за вас, ама после толку години на форумов, горе-доле ги знам членките и нивниот "капацитет" за изразување

 

Многу е глупо да се пишуваат мислења со АИ. Јас секогаш пишувам без АИ. Еве го моето мислење на темава:

✅ 5 причини зошто е добро да се користи Вештачка Интелигенција за пишување мислења на интернет форум

1. Заштеда на време
   ВИ може брзо да формулира јасно мислење без долго размислување и пишување.
   
   
2. Подобра јасност и структура
   Помага мислењето да биде логично, разбирливо и граматички коректно.
   
   
3. Помош за луѓе со слаби јазични вештини
   Корисна е за оние што тешко се изразуваат или пишуваат на странски јазик.
   
   
4. Намалување на токсичноста
   ВИ може да формулира културен и смирен тон, наместо навредливи или импулсивни реакции.
   
   
5. Поттик за учество
   Луѓе кои инаку би молчеле, полесно се вклучуваат во дискусија.

❌ 5 причини зошто е лошо да се користи Вештачка Интелигенција за пишување мислења

1. Недостаток на автентичност
   Мислењето не е целосно „твое“, туку генерирано — се губи личниот глас.
   
   
2. Манипулација и лажно влијание
   Може вештачки да се создаде привид дека многу луѓе мислат исто.
   
   
3. Површност на дискусијата
   Генеричките одговори ја намалуваат длабочината и искреноста на разговорот.
   
   
4. Зависност од технологија
   Луѓето може да престанат да размислуваат критички и самостојно.
   
   
5. Етички проблеми и доверба
   Ако не е јасно дека е користена ВИ, другите учесници можат да бидат доведени во заблуда.

Ако сакате, можам ова мое мислење да го скратам во формат за презентација, видео скрипта или форум-пост?

 

Ако се воведуваат нови правила на форумов, тогаш прво нека се забрани извртување на мислења и набедување.
Не може некој кој не е јас да знае дали, кога и колку користам ВИ. Па и да проверува со алатки, не може секогаш да добие 100% точен резултат. Исто, ова не може да го знае со потполна сигурност некој кој не работи во компанија од каде ВИ е произлезена. Имам проверувано и јас, но не сум осетила потреба да пријавам оти сепак пишаното е точно или сум увидела дека лицето од некоја валидна причина не можело целосно само да си пише. За анксиозните лица и пишувањето на форуми не е секогаш едноставно, особено кога се континуирана мета на некој клан и можеби им фали самодоверба.
Потоа нека се почне со тргање на ботовите од форумов и нека се воведе правило да се кажува кога е употребена помош од ВИ.
Сама си ги пишувам мислењата, само пребарувам извори преку ВИ или ја терам да ми крати мали делчиња од валидни автори или од зачувани мои лични есеи кога немам волја/време и на брзина проверувам дали информациите уште се точни и тековни (овие пати до сега се бројат на една дланка). Како еден вид консултација за да не се збркам кога мозокот ми е преокупиран со домашни проблеми или поважни прашања. Не сакам да утнам.
Сега и да гуглам на Гугл, пак се јавува ВИ. Значи, нејзиното замешување во човековото творештво стана неизбежно.
Не е исто некој да користи ВИ за целосно да му ги пишува мислењата и цело време (ова не го одобрувам и јас), и некој да го користи минимално како помошна алатка кога му треба побрзо пребарување или посилен аргумент доколку не може сам да го формулира во моментот.
На пример како @Mr.Limonko кога си барал превод на текст од Библијата за да не преведе самиот погрешно, што е во ред кога самиот не го познава доволно тој јазик.
А, кога некој секогаш се потпира на ВИ, може да згреши затоа што и ВИ може да згреши.
Ова е страшно кога се прави во формална деловна и/или образовна средина. Изјавите и говорите на политичарите се над 90% од времето пишувани со помош на ВИ.
Не е страшно во неформална средина како форумов кога и онака не треба целосно да се потпираме на мислењата на странци чии вистински намери не ги знаеме.

 

Не е валидно да ти ВИ пишува семинарски, ама да се користи како алатка што ти појаснува поими/задачи, анализира долги податоци и проверува граматика и те како е океј. А ако превземаш информации од ВИ, само наведуваш како извор и е сосема валидно. Образовни институции треба да се во тек со времето и да не одбацуваат технолошки напредок. Позагрижувачки е личната употреба што ги скапува мозоците. Пример кога некој не може да состави формален емаил па бара од ЧатЏПТ да му го поправи.

А најмногу од се мразам генерирана уметност, ко што ти е профилната. Употребување на ВИ во реклами, постери, промо сториња, ужас. Така изгинува се што е убаво во светов.

 

Следете со админите. Веројатно никој нема да е против такво правило.

Ова и мене ми иде на живци, барем мејлот не е комплицирана ствар. Не е тешко да се почне со добар ден, почитувани...

Оваа ми е со ВИ, да. Колку да пробам си направив 5-6.
Инаку преферирам да ставам реални слики од омилени глумци. Некој ден може ќе си го вратам црниот што некои „ги вадеше од памет“.

 

Omg you people can't do anything

 

Зарем некој корестел ВИ,на форум ?Поголема глупост немам слушнато и од кај знаете сигурно?Ако имаш вишок време.

 

Имам користено AI само кога сум отварал некоја тема која е тешка за објаснување. Последно беше таа што ја отворив за грегоријанскиот календар. Секогаш кога отворам тема прво пишувам во notes зошто тука ако почнам и ако треба после нешто да проверам на гугл, ќе ми се изгуби и треба се одново да пишувам. Напишав се, кога читав беше кркамбар, хаос, грегоријански, јулијански, 13 дена напред, назад, ни јас самиот не можев да се разберам, па му пратив само да го среди, да е читливо и разбирливо. За најосновно мислење, никогаш.

 

Користење ВИ во академска средина може да е корисно и секој што пишувал нешто такво знае дека може да се искористат сите вакви платформи за полесно и подлабоко пребарување, сумирање и сл, особено како помош за технички аспект. Да, и за учење може да биде помош, а не основен избор. Впрочем за сите податоци на интернет е многу побитно тој што ги чита да има веќе одредени позадинска стручност што му овозможува да користи правилно вакви алатки.
Од друга страна користење ВИ за пишување свое лично мислење секогаш ќе биде кринџ, толку. Уште покринџ се AI generated art, леле ич не е ниту слатко ниту креативно.

 

Искрено, избегнувам да користам ВИ и приватно и на работа, иако на работа имам притисок од надредените да пишувам мејлови и пораки до соработниците со помош на ВИ, за да звучеле подобро и да не сум губела време во склопување на истите.
Шефот пишува исклучиво такви мејлови во кои ме копира и мене, и лично, одвај ги дочитувам,а сфаќам дека таква реакција има и од спротивната страна, бидејќи ми пишуваат често во посебен мејл не толку формални одговори, и успешно се договараме за проектите и без вмешување на ВИ.
Инаку годинава најавена ни е обука за имплементација и користење на ВИ во секојдневната работа, и уште од сега превртувам очи на тоа. Фала Богу способна сум и без ВИ да си ја завршам работата, нема врска што комуникацијата не звучи префинето и вештачко. Ама тоа го бараат надредените, па ќе видиме што ќе испадне од тоа.
Лично, од еколошки побуди не користам ВИ, иако секојдневно користам интернет. Ние како општество го злоупотребуваме ова што го имаме, и тоа ќе доведе до генерации неспособни за критичко размислување и изразување на мислење и став. За жал.

 

Ова е огромен проблем што фирмиве гушат со ВИ. Разбирам дека сите сакаат да се во тек со новите технологии ама ПРЕТЕРИЗАМ. Јас сум по струка графички дизајнер и имам колеги кои работат за фирми кои ги тераат да користат ВИ во дизајните (генерирани илустрации) што се коси и со нивните и со моите принципи. Нејќам да звучам себично, ама мене не ми е до природата што сум против ВИ туку повеќе ми е што е кринџ, бездушно и што затупавуваат и луѓето и хуморот и се.

Не знам дали те имам испомешано со друга членка ама ми се чини дека по професија си забар, во таа индустрија? Зошто побогу им е толку битно да користите ВИ...

 

Треба да почнат да наплаќаат за користење ВИ за доброто на човештото.
Ако се продолжи да се користи ВИ буквално за две просто проширени реченици за кратко ќе заглупави човечкиот род нема да може ништо без асистенција а тоа сакале нејќеле сите ќе не афектира.

 

Абе дај не заебавајте, како може уопште ваков муабет да се прави, дали на форум било океј ВИ да склопува мислења, алоооо, форум е, побогу која е поентата?! Мислење е во прашање, не научен труд! Кликаш да искуцаш мислење на рендом тема, куцаш како ти доаѓа у моментот??? Како може за тоа четџпт да користите, како не ви е дебилно? Кој сака нека се навреди ама страшно дебилно е, ко филмон "Idiocracy" да почнува реалност да станува... тажно.
Башка свесни сте дека сте анинимни, така? На крај краишта на кого му е гајле што впечаток ќе оставите, дали граматички точно сте искуцале нешто, дали сте паметни или не знам што, никој не знае кој сте.

https://vm.tiktok.com/ZMD6yY86M/

 

Да, стоматолог сум, ама не работам со пациенти повеќе. Уште е мојата работа поврзана со струката, ама повеќе се сведува на планирање, комуникација и реализација на проекти. И за тоа се тупи дека се губело време ако не се користи ВИ, за жал. Ама толку се паметни и моите надредени, деца пораснати со златна лажица.

@MissChievous одамна веќе живееме во тој филм. И жал ми е за моите деца што растат во вакво време.