Слепа вера

Долго се мислев дали да ја отворам оваа тема во Политика или Религија. Можеби најсоодветното место за ваква тема би била категоријата Психологија, ама ајде сепак тука ја отворив, бидејќи е инспирирана од веста за чудото што наводно се случило во Грција со некое мистериозно дете од Струмица кое наводно било цел живот немо и проговорело таму пред некоја икона. Велам „мистериозно дете“, бидејќи струмичани не чуле ништо за вакво дете за кое не информираше еден грчки сајт, поточно блог.

Што за вас претставува слепата вера?
Дали е ок да веруваме слепо и ако не, како човек да го надмине тој психолошки феномен?

Според Urban Dictionary, слепата вера се случува како некој ја става својата вера во нешто без никаков доказ.
(Извор: http://www.urbandictionary.com/define.php?term=Blind Faith)

Според мене ова пред се е психолошки феномен кој кај личноста се одразува не само во поглед на неговите религиозни верувања, туку и во неговите идеолошки убедувања, политички убедувања, па и во секојдневниот живот во поглед на разни суеверија, верувања во теории на заговор, верување во разни гласини што се шират на фејсбук, твитер, низ комшиите, на улица и сл.

 

Деновиве бевме сведоци како припадници на одредени политички партии безрезервно веруваат во информациите што ги пласира нивната партија без притоа да понудат ниту еден доказ. На пример и двете поголеми партии (ВМРО и СДСМ) објавија дека од 38.712 неважечки ливчиња, над 32.000 биле со заокружен број 4 (според СДСМ) или 1 (според ВМРО) но дека биле намерно поништени со допишана цртичка или буква со мастило кое изглегувало од прстен или според други од скриена мина во ракав и сл. Бевме сведоци како лојалните фанови на политичките партии така лесно ги примаа овие вести и пишуваа убедени во нив... најверојатно бидејќи тие информации беа во склоп со нивните претходни убедувања. И ова е слепа вера, бидејќи лесно се убедува во нешто без никакви докази.

 

Вистина ви велам, ако имате вера и не се посомневате, ќе го правите не само тоа што и се случи на смоквата, туку ако и речете на оваа гора: 'Дигни се оттука и фрли се во морето!' ќе стане така, и се што ќе побарате во молитва, со вера, ќе добиете."
(Матеј 21:18-22)

 

Јеп. Верувањето е поширок поим од само верување во Господ. Луѓето веруваат и во идеалите на партијата, им веруваат на партиските лидери. Со својот глас на изборите ја положуваат нивната доверба во нив. За жал многу луѓе дури и слепо веруваат во некои политички изјави без ниту еден доказ (види го примерот од претходното мислење). И затоа ваква тема.

 

Значи да разграничиме. Темава требало во психологија да стои кога веќе станува збор општо за слепата вера во што и да е. Нека види @RainBow и нека ја префрли ако и таа го има тоа мислење.
Прво, мистериозното дете и не е така мистериозно, туку ти не си направил доволно research. Другарка моја ми кажа дека во Струмица не е едно немо дете, ги има повеќе но ете не знае кое од нив било тоа за кое пишуваа медиумите. Можно е и детето да било по потекло од Струмица но да живее на некое друго место. Дали е тој случај вистина или не не знам, а би требало да е, православни сајтови не шират лаги, јас знам дека такво чудо е сосема возможно. Тоа иде како да одиме да го прашаме свештеникот било што па да се прашуваме после дали тоа што го кажал е вистина или не е. И на мене ми се случиле некои чуда, помали, но доволни за да верувам во божјата семоќност.
А што се однесува до политиката и остали области, верувањето во нивни изјави е веќе тежок случај. И на форумов сите видовме во темата Актуелни политички настани. Човекот не мисли со своја глава, прифаќа се што ќе му се сервира и тоа е крајно.

 

Убава тема за дискусија, која ете може да најде место и во религијата, па и во психологија, политика, филозофија, општи моабети..
Бидејќи е темава во религија, ете да си кажам мое мислење како православна христијанка. Бог ни дал разум, очи, слободна воља, така да не гледам причина при очи и разум, да се правам слепа, да веруваме во нешто што не сум видела ниту чула, сакам да ја барам вистината која се наоѓа само по патот на искуството или просто кажано, треба да се изгориш за да знаеш што е вруќо.
Мислам дека ни Бог не би посакал "слепи верници" кои само ке проповедат едно те исто од зацементираната библија, ке коленичат по цели денови, ке се молат, постат, послушници ...(а има ли такви воопшто во светот)!?

 

1. Веста не беше објавена во „медиуми“, туку во православен блог. Серверот blogspot.mk е бесплатен блогспот и тинејџери можат да си отворат таму блог и да пишуваат за вонземјани што виделе, за вештерки, баба роги и сл. Потоа заради новинарски сензационализам, веста беше преведена и копи-пејстирана од некои тукашни сајтови. Методот преведи и „копи-пејст“ воопшто не спаѓаат во истражувачко новинарство.

2. Правам Research уште откако беше објавена вест. Прашав десетина струмичани од центарот на градот, од Моноспитово, Муртино и други околни села. Никој ништо не слушнал за ова мистериозно немо дете што проговорело. Една од нив ептен се заинтересира и рече ќе се распраша по роднини и пријатели, ми кажа дека ништо не дознала. Се јавија и неколку струмичани и од форумов (како @Lella ) и рекоа дека ништо такво не чуле. Жена да се разведе во Струмица, за 2 саати до Радовиш ќе се дознае, а не па цел живот немо дете да проговори
Прашав и на твитер каде што имам 6277 followers, никој ништо не знае, а сигурно 50тина од нив се од Струмица.
Прашав и еден мој близок пријател кој е овластен толкувач на знаковен јазик и кој ги познава глувонемите деца, ни тој не знае.

3. Глувонемите деца во Струмица се дружат меѓу себе. Се дружат, бидејќи тие си комуницираат меѓу себе со знаковен јазик. Доколку едно од нив проговорело, сигурно другите ќе знаат. И не само тоа, туку и за ден два ќе се нацртаат пред таа икона во Грција со надеж дека и они ќе проговорат. Доколку твојата пријателка прашала едно од овие глувонеми деца, сигурно ќе знаела.

Добар обид Ми се допаѓа како размислуваш и супер што си поставуваш прашања. Со прашања започнува истражувањето. Ајде да видиме што се вели во објавената вест:

„Според објавеното сведоштво, во манастирот, покрај братството, на поклонение било дојдено и 18-годишно момче од Струмица кое било немо. Тоа било дојдено со некој роднина од Солун, кој му раскажувал за манастирот и за чудотворната икона на Мајката Божја.“ (извор)

Значи овде јасно си пишува дека детето било од Струмица, а неговиот роднина од Солун. Да доаѓало детето од Загреб, не гледам причина зошто би го криеле тоа. Нема сигурно полиција да го брка за да го уапси затоа што проговорело нели? А таму, во својот град, таму сигурно нема да може да сокрие дека проговорело. Навистина би било лудост да веруваме дека сега детето ќе се крие во некој подрум или дека ќе се преправа дека сеуште е немо само за да не го дознаат за тоа „срамно злосторство“ што му се случило - што проговорело

Хммм пази го аргументов: „Тоа е вистина бидејќи беше објавено на сајт од мојата религиозна деноминација, а сајтовите од мојата религија никогаш не лажат.“
Можеш да замислиш како истово го кажува и припадник на мормоните? Или припадник на заедницата на Кајшаров? Можеш да замислиш како истово го кажува и член на некоја политичка партија? Таа дискусија би звучела вака:

- Од 38.712 неважечки ливчиња, над 32.000 биле со заокружен број на мојата партија, но биле намерно поништени со допишана цртичка или буква со мастило кое изглегувало од прстен
- Имаш некаков доказ за тоа?
- Не, ама тоа го пишуваше на сајтовите од мојата партија, а тие никогаш не лажат
- Па истото го пишуваше и на сајтовите од другата партија, само таму се велеше дека нивниот број бил заокружен и поништен. И тие велат дека никогаш не лажат. И сега кому да верувам?

Ете затоа ја отворив оваа тема „Слепа вера“ и сметам дека е исклучително важна особено за нашево поднебје.

И јас како христијанин верувам дека е возможно, но не значи дека секоја вест за такво чудо е вистина.
Познавам многу свештеници, пастори, теолози и сл. Немој да ги идеализираш. И тие се луѓе. И тие знаат да лажат и намерно и ненамерно.
Пред 10тина години бев во манастирот Бигорски со група туристи меѓу кои имаше и една пријателка која имаше студирано историја на уметност. И таа го праша еден монах од кога датира една икона. Не се сеќавам од кој век и кажа, ама се сеќавам на нејзината реакција:
- Ама како е можно, овој тип на уметнст се јавува многу подоцна?
Монахот: Добро ама дрвото на која е насликана датира од тој период

Со други зборови го фати во лага монахот. Можеби ненамерно лажел, а можеби и дека виде странци, па ајде ќе ги лажам дека ова се многу стари икони за да ги купат и да си направам бизнис.

@Bitter-Sweet , да бидеме искрени и овде, на форумов Религија, видовме верници кои не мислат со своја глава и прифаќаат се што ќе им сервираат нивните свештеници или сајтовите од нивна религиозна деноминација и одма пишуваат амин АМИН amin AMIN Познато ти е ова? Не само што не мислат со своја глава и прифаќаат се што им се сервира, туку дури и ги осудуваат оние што поставуваат прашања и што бараат некакви докази за чудата. Мене дури и ме нарекоа „атеист“ затоа што мислам со своја глава не прифаќам слепо она што се сервира Е тоа е крајност.

 

За мене слепа вера е да веруваш во нешто што не го гледаш и притоа за резултат да го видиш она во што си верувал!

 

Конкретно за немото момче и политичките партии немам мислење, и мојата слепа вера не би ја поврзала со нив. Но, има работи во кои слепо верувам.....
Верувам дека Бог постои, дека такви исцелувања навистина се случуваат заради Неговата семоќност и исцелителна моќ. Не ми требаат докази, ниту за неговото битисување, ниту за излечените души. Едноставно верувам. Не сум имала моменти кога сум се посомневала во тоа од причина што кога мене ми било тешко молитвата ми помогнала. На некој начин тоа е за мене доказ дека Бог постои и ме штити. Не е опиплив, но во мене постои такво нешто и не читам православни портали за да ја најдам вистината. Верувам дека е вистина. Ако веќе имам потреба, побрзо би прочитала некоја православна книга отколку портал.
Зошто не би било во ред слепо да верувам, кога тоа ми носи душевен мир и спокој?

 

Не е темата уопште глупа ниту навредлива, само што може да се премести во психологија или можда во општи дискусии за да се дискутира поопшто.

А за жал сè уште за многу луѓе реално се однесува второто, општо за секаков аспект на дискусија... иако никој не би си го признал тоа

 

Ми се допаѓа коментарот на @Jas! Ме поттикна да поставам прашање за членот.
@EvAngelos , зошто ти веруваш во Бог? Не си го видел а сепак веруваш во негово постоење. Како е тоа можно? Ако упорно го бараш немото дете за да можеш да поверуваш во чудото, тогаш треба и да го видиш Бог за да знаеш дека постои, по твојава логика.

 

,,Слепа,, вера-најзастапено нешто кај нас, во било кој аспект и религиски и партиски и филозофски. Во стилот не ми требаат мене никакви, докази и не сакам да се замарам со ништо, тоа ми е кажано и ке си го земам за точно и толку. Без истражување, без друго мислење, без размислување со своја глава пред се. Да се надоврзам конкретно за мистериозниот случај погоре, некој го постирал без ни да го прочита до крај претпоставувам, друг бидејќи го прочитал само тоа, а не му се истражува повеќе па слепо ќе си верува во него, и по секој цена ќе го брани тоа гледиште бидејќи, ако некој му презентира докази и аргументи ке треба да се навлегува во дискусија, а за дискусија не се спремни они што слепо веруваат па така макар и спротивното им паднало врз глава тие пак слепо ќе ви веруваат во тоа што го прочитале/чуле.
Можеби е во прашање гордост и суета, па не се ментално отворени за други ставови и гледишта, бидејќи можеби на крајот она во што верувале тие не е вистина, па не сакаат најпрво самите на себе да се признаат дека не биле во право.

 

Затоа што слепата вера е подложна на манипулации, на суеверија, празноверија, бајачи, гатачи, уроци, црни бели магии, ова носи среќа, она носи несреќа, гледање на кафе, соништа, тарот карти итн
Човек што практикува слепа вера кога ќе се разболи, наместо да отиде на доктор, може да отиде кај Иван исцелител или Кајшаров, ќе добие лажна надеж и спокој за исцеление, но нема да се излечи и може и трагично да заврши.

Постојат луѓе шетаат со избледени листови ко бајаги собираат донации за некое дете за операција на срце. Таквите луѓе најчесто влегуваат кај што има отворени врати (домови, канцеларии) и крадат. На фирмата што е над нас таков човек им украде телефон, новчаник со документи со се. Ако го фатиш внатре, ќе ти рече: „Добар ден, беше отворено и влегов да барам за болно дете од рак... и оп те фаќа на емотивна манипулација.
Луѓе што слепо веруваат (без да проверат што пишува на листот) им даваат дури и пари на овие луѓе. Знаеш колку сум фатил вакви луѓе во лага? Еднаш го земав листот и видов дека е потпишан во 2007 год. И реков на ромката: Жено, листов ти е од 2007ма, до сега 5 пати ќе ти умрело детето ако чекало операција на срце од тогаш.

Еднаш еден ми влезе на работа еден со лист од болницата Филип 2ри. Исто така бараше пари за операција на срце. Го земав листот, што да видам, обичен рекламен лист за болницата Филип 2ри Овој човек имаше полно плико пари од луѓе кои биле емотивно изманипулирани и слепо му верувале дека собира за операција на срце. Сличен ваков човек на мојата колешка и го украде мобилниот додека она отишла во другата соба за да извади пари од ташна со цел да му ги даде

Трет случај ми дојде еден без лист. Упс навидум немам сега што да проверам нели? Ама не, го прашав како се вика детето. Ми кажа едно име. Го прашав дали е веќе пријавен како пациент, ми рече да исто така во Филип 2ри. Се јавив во Филип 2ри, им објаснив, ги прашав дали имаат пациент со тоа име, ми рекоа не. Чао пријатно.

Оние кои со слепа вера донирале, можеби имале мир и спокој на душата дека ете тие направиле некакво хумано дело, дека учествувале во спасување на некои младо мило детенце. Верувам дека се чувствувале убаво, но реалноста е дека парите што ги донирале завршиле кај измамник кој вечерта уз кило ракија се фалел на другите измамници како измамил 50 души у еден ден

Се надевам дека сфати зошто не е во ред слепо да се верува. Поздрав @Jas!

 

Мила моја, морам да ти го поставам прашањево-Како може слепата вера да ти носи душевен мир и спокој!?
Мислам дека за да бидеш во таква состојба, ти треба да бидеш изолирана од цел свет, да не гледаш, да не слушаш.
Како е можно да не допираат до тебе тугите маки, да не те здоболат туги солзи? Можно ли е ако наидеш на некоја пречка или на некој тежок животен проблем, ти така лесно да го игнорираш, да се тргаш настрана без да се соочиш, бориш!?
Многу луѓе кои негативните работи ги ставале во потсвеста, неистражените, непроверените вистини,ги тргале во стилот на -така Бог сакал-, и еден ден, откако се наполниле со непотребни работи, дошле до кулминација во мозокот и морале да побараат психијатриска помош. Ние луѓето не сме од камен створени, имаме емоции и неможам да бидам слепа и глува кога гледам детски солзи. МУ се лутам на Бога и неможам такви неправди да поднесам..

 

Не верувам слепо во Бог. Верувам во Бог затоа што имам силни аргументи за Неговото постоење - а тоа се отисоците кои Тој ги има оставено во созданијата што ги создал. Еве тука имам напишано една цела статија (со точки и потточки) „Научни аргументи за Божјото постоење“. Доколку не си по науката, прочитај ги барем илустрациите во воведот и ќе видиш дека има разумни и логички аргументи (наспроти слепа вера) дека овој Универзум е плански и интелигентно дизајниран од едно интелигентно битие (Бог), а не случајно настанат од слепите сили на природата. Исто така можеш да читаш и за животот, клетките, ДНК молекулата, ензимите кои заедно се покомплексни и од една цела фабрика, јасно говорат дека не би можеле случајно да настанат, туку дека морале да бидат плански и интелигентно создадено од едно супериорно битие - Бог.

И ова се само неколку разумни причини зошто верувам во Бог. Други причини ми се:
- Животот и воскресението на Исус (сметам дека има солидни историски докази дека Исус правел чуда и воскреснал). За Исус имало живи сведоци (и од пријателската и од непријателската страна) дека правел чуда и дека го снемало од гробот. Колку објективни сведоци има за немото дете што проговорело?
- Пророштвата во Библијата (човечка мудрост не може да предвиди стотици работи со векови пред да се случат)

Се надевам ја сфаќаш разликата меѓу ваквата вера во Бог и верата во објавената вест во некој грчки блог за некое дете од Струмица што наводно проговорело а никој во Струмица ништо не знае за тоа.

 

Blagosloveni se onie,koi vo srceto go čuvstvuvaat Boga,koi imaat ličen odnos so nego.

Site drugi koi poradi intelektualni,utilitarni,moralni,tradicijski ili ne znam kakvi se ušte ne pričini,se obiduvaat da veruvaat imaat slepa vera

Nekoi od niv ke progledaat,ne e isklučeno

 

Интересна тема. Еве едно објаснување за тоа какви типови на вера постојат.

Филозофот Пол Курц дефинирал три различни типови на вер(б)а, во однос на изобилството (или недостатокот) на докази кои се во нејзин прилог.

Првиот тип е наречен „intransigent faith“, односно верување врз кое докази за спротивното нема да имаат никакво влијание, без разлика колку и да се силни. Поинаку кажано, човек кој верува на овој начин нема да биде поколебан во своите верувања, какви и докази да се појават кои се спротиставуваат на неговите верувања. Овој тип на вера е наречен тип I.

Верата од тип II е наречена „волја за верување“ од страна на филозофот Вилијам Џејмс. Курц ја дефинира како „willful belief where there is insufficient or no evidence either way to make a rational choice“, односно личен избор да се верува во нешто, иако не постојат доволно докази ниту во прилог, ниту против даденото верување.

Често пати, верувањето од тип II нема врска со логиката на нештата или со она што е порационално, туку верувањето е базирано на чувства – се одбира онаа опција која ни дава повеќе утеха, која е општествено поприфатлива или едноставно полесна за верување. На пример, некој кој е поддржувач на дадена политичка партија само затоа што неговото семејство отсекогаш било за неа пројавува вера од тип II.

На крај, верата од тип III e опишана како „хипотеза базирана врз докази“. Во овој случај, постојат докази, но недоволен број или со недоволен квалитет за да поддржуваат целосно верување во нешто.

На пример, човек кој поминува улица во моментот кога семафорот се сменил во зелено пројавува вера од тип III – тој прави претпоставка дека светлото ќе биде зелено доволно долго за да стигне безбедно до другата страна на улицата – оваа претпоставка ја базира врз долгогодишното искуство со семафори и знаењето на намерите на оние кои ги дизајнирале, произвеле, поставиле и ги одржуваат семафорите.

Науката создава хипотеза заснована врз опсервации, а потоа ја испитува валидноста на хипотезата. Ако се направат доволно опсервации и идејата е темелно анализирана со позитивни резултати, хипотезата станува теорија. Убавината на теоријата е што таа може да подлежи на ревизии и/или коренити промени, ако на виделина излезат докази кои се спротиставуваат на неа.



На темава, се сложувам дека поимите како „вера“ и „верба“ имаат многу поширок домен од областа на религијата. Човек може да има вер(б)а во сопружник, пријател, поп, политичар. А верата може да му биде базирана врз докази или чувства.

Но, она што е поинтересно кај верувањата е дека без разлика дали се базирани на докази или не, откако човек еднаш ќе донесе (свесна или несвесна) одлука да верува во нешто, тоа верување е многу тешко да се смени. Ова се должи на длабоко всадената биолошка/психолошка потреба на човекот да биде во право, без разлика на се. И не само што луѓето се пристрасни во однос на своите верувања, туку и селетивно ги восприемаат информациите поврзани со сопствените верувања. Имено, работите кои се во прилог на прифатеното верување се прифаќаат, како афирмација на истите, и најчесто, им се придава и поголемо значење од она што реално го имаат, додека работите кои на било каков начин го поткопуваат или негираат верувањето, се отфрлаат, а нивното значење се минимизира или целосно занемарува.

И ова е така во секоја сфера од човековото живеење, без разлика дали се работи за религија, политика или меѓучовечки односи.



А дека одредени сфери од животот не само што не ја осудуваат, туку напротив, и ја охрабруваат „слепата вера“ или верата од тип I, и тоа е точно, особено ако зборуваме за религија и политика. Религијата оди и толку далеку што не само што не поддржува скептично размислување, туку и активно го обесхрабрува и осудува (секако, генерализирам). Оттаму и изреката „неверни Тома“, која се однесува на скепсата на апостолот Тома, која речиси без исклучок се користи во негативна конотација.

Тоа е така бидејќи и на политичарите и на свештените лица повеќе им одговара ситуација кога луѓето го прифаќаат во она што тие го „проповедаат“ верувајќи им на збор, отколку за истото да бараат докази или да му пристапат со скепса и сомневање.

Скептичното размислување може да доведе до ситуација во која луѓето ќе сфатат дека она што им се сервира можеби и не е баш такво какво што го претставуваат или уште полошо, дека е целосно спротивно на вистината. Ова пак, може да доведе до нивно оддалечување од одредена религија или политичка партија, а тоа е она што свештенството и политичарите најмалку го посакуваат, бидејќи ефективно претставува губење на власт и моќ.

И баш поради оваа причина, религијата и политиката се сфери кои изобилуваат со луѓе кои имаат слепа вера.

 

Ako tip 3 bara dokazi,a tip 2 e vera po ličen izbor poradi x pričini,ostanuva nejasno na sto se temeli verata na vernikot klasificiran kako tip 1 ?