На 19-ти овој месец на Плоштад Македонија ќе се одржи четвртата традиционална Кампањата за борба против рак на дојка, насловена како “Напред розово 2012 - чекори против ракот на дојка“. Здружението „Борка - За секој нов ден“, во соработка со Здружението „Интегритет Алфа и Омега“ и Амбасадата на САД во Република Македонија се организатори на овој настан. Повеќе од 1.500 учесници ќе се вклучат во розовата прошетка и ќе пешачат цели 3 километри со цел да испратат порака за важноста на раната дијагноза и поддршката на пациентите, како основен предуслов за победа над ракот на дојка. Во прошетката ќе земат учество сите граѓани на Република Македонија, вклучувајќи и организирано учество на поддржувачи на Борка од градовите низ Македонија. Откако ќе заврши прошетката ќе следува организиран музички настан и неформални социјални активности со едукативен карактер, социјални игри кои ќе имаат за цел да овозможат луѓето, т.е. борците против ракот на дојка да се зближат, да се дружат и да го слават животот. Големи подржувачи на кампањата и задолжени за музичкиот настан се пејачите Биба Додева, Александра Пилева, Дани Димитровска, Маја Гроздановска, ДНК, Игор Узунов, Тони Зен, Фани Христова, Елена Ристевска, Елена Петреска, Роберт Билбилов, Кристина Арнаудова, Леа & Eye Que, Влатко Илиевски, Тамара Тодевска и други. Ќе бидете ли дел од оваа кампања?