Сакам да кажам...

Веќе некое време макнувам со прстите во ова тема, ама си реков дојде денот да ја продлабам малку.

Коренот на Мадона-курва комплексот е мизогинијата. Зошто? Ваквиот комплекс влијае на мажите да ги стават жените во две категории: или се мајки (Мадона) или се курви. Мадона е идеална жена, мајка, грижлива, субмисивна, се грижи за домот и децата, ама од друга страна не ги исполнува сексуалните фантазии и не е сексуално битие зошто така се „валка“. Од друга страна курвата е валкана, површна, нечиста, само за забава и не вредна за љубов, ама та е сексуално битие кое ги исполнува фантазиите зошто можи да се оддели од тој „чист“ дел во кој се става Мадона. И уствари ова е водилка за мизогинија зошто жените се ставаат во ригидни категории, иако и Мадона има сексуален нагон, и Мадона сака да е посакувана и да е цел на фантазија. Исто и „курвата“ сака да е сакана и вредна за љубов, а не само да е нечија фантазија. Реченицава убаво објаснува: „овие мажи онаму каде што сакаат - не можат да посакуваат, и онаму каде што посакуваат - не можат да сакаат“. И ова ултимативно е секогаш на штета на жената зошто секогаш излегува несреќна и како да игра улога. Многу често читам проблеми онлајн на луѓе и ќе прочитам: „се роди првото дете и не сакаше да му дам орален секс зошто го бакнувам детето со таа уста“ или „не верував дека некои мажи се менуваат во брак, но од кога сме венчани тој не ме посакува како што ме посакуваше додека бевме во врска“ и многу вакви јасни индикатори на ваквото гледање и делење на жените во две ригидни категории.

Фројд првично го измислил терминот „Мадона-Курва Комплес“ (МКК или латинично Madonna-Whore Complex MWC) за да ги опише мажите во хетеросексуални врски кои повеќе не ги гледаат своите партнери, за кои имале романтични чувства, како сексуално привлечни. Теоријата на Фројд беше дека мажите со овој комплекс не можат да направат разлика помеѓу љубовта кон својата мајка и љубовта кон нивниот романтичен партнер. Мажите кои го имаат овој комплес, не можат да ја гледаат женската сексуалност како „љубовна“ и „сексуална“. Мора да биди или-или. Или „љубовна“ или „сексуална“, ама никако двете заедно. За да се справат со вознемиреноста која ја носи овој комплес, овие мажи за да осетат сексуална привлечност мора да сведат партнерката на сексуален објект, зошто само тогаш можат да не ја асоцираат со Мадона или „мајка“. И многу често одбираат партнерка која не им е сексуално привлечна, само зошто ги исполнува другите услови кои сметаат дека една сопруга и мајка мора да ги има. Би додала дека и е привлечен од партнерката во врска, но таа привлечност ја нема во брак и кога стануваат родители. И затоа сексуалните фрустрации често се „лечат“ надвор од бракот, кај жена која по нивни стандарди е „курва“ или промискуитетна.


The Madonna of Humility with the Temptation of Eve
1400
Olivuccio di Ciccarello

Сликата на Ди Чикарело многу добро го опишува тоа „црно-бело“ гледање, каде ја имаме девицата Марија, целосно облечена, со бебе на града, горе во светлината. И под неа ја имаме Ева, гола, грешница, во темнината.

И зошто уствари се смета дека мизогинијата е основата и коренот на ваквото гледиште, и како уствари жените се повредени од истото? - Феминистичката теорија ни кажува дека овој комплекс е длабоко вкоренет во поддржувањето на нашето патријархално општество во обид да ја контролира сексуалната автономија на жените. Срамот на жените кои имаат сексуална слобода ги зајакнува штетните родови стереотипи и двојни стандарди, дозволувајќи им на мажите да ја задржат позицијата на моќ.


Sacred and Profane Love
1514
Tiziano Vecellio

Премногу поединци се плашат од зборот „феминизам“ и како тој може да ги промени општествените и сексуалните реалности. Проблемот е што ако не ги промениме овие мизогини подвизи, жените ќе продолжат да страдаат, а мажите исто така ќе го носат товарот на токсичната машкост (и сите знајме дека тоа не е во корист ни на мажите, ни на жените). Мораме да размислиме како зборуваме и размислуваме за сексуалната автономија на жените за да создадеме побезбеден свет во кој жените ќе можат да напредуваат, без да се плашат од осудување или да трпат било каква форма на насилство.

И се ова ме носи до важноста на женската сексуалност и како општеството пробва да ја контролира жената со ујачување на срамот од нешто шо е уствари ... нормално. Ако на сексуалноста се гледа како на нешто нормално ќе имаме реалност каде сексот ќе биди побезбеден, посакуван и нема да постојат истиснати чувства на незадоволеност и фрустрација. Ако некоја жена сака да има секс, ќе има секс зошто потреба за секс и функционално либидо е знак на здравје и здрава врска. Исто ќе се тргни табу околу притисок за и околу секс - не е срамота некоја да не сака да има секс, исто како што не е срамота некоја да одбери да има поинаков секс, и на овој начин ќе можиме сите подобро да разбериме и идентификуваме и „суптилно“ насилство во сексуална врска.

И така.

Thank you for coming to my TEDtalk.