Еден од најубавите видови на накит, изработка со метали, да не речам перфектна рачна изработка, накит со душа, кој го примамува сечие око, уникатно и вредно парче накит. Еден период филигранот беше на работ на исчезнување во Македонија, но за среќа во последниве години се појавија и нови уметници и креативци кои ја продолжуваат изработката на овој накит. Но не е само накит, тоа може да се и слики, украси, кутии, познат е и во црковната уметност за изработување крстови и фрески, тоа се со еден збор уметнички дела. Колку ги сакате филиграните? Дали имате филигран? Дали е наследство од вашата мајка/баба? Дали и од каде купувате филиграни од Македонија? Дали носите често? Дали сте подариле или би подариле? Омилен изработувач или продавница?
Сакам филигран, ама немам. Не сум наследила, никој не ми подарил, не сум подарила, би подарила. Овие најмногу ми се допаднаа на твојот блог што ги имаш поставено.
Македонка без охридски бисер и парче филигран не бидува. Обожавам филигран, имам уште како мала добиено брош пеперутка и го немам допрено кутичето, така стои, и едно помало за матура. Сакам да си купам уште два броша сигурно, баш разгледував низ град, цената е од 1200 - 2000 и кусур по Рубин Кармин на пример, и тоа пообичните, само од сребро. Ако имаат драгоцени камчиња, пр. јас сакам со сино да е пеперутката, тие стигаат и по пар стотина евра, што значи ич не се евтини. За свадба ќе си барам.
Единственото парченце ваков накит го имам добиено од баба ми, кога сум дошла на свет. Слично е како пеперутка-брошчето што го постирала Росонерка. И едноставно не можам да се изначудам колку прецизно е создадено нештово, стварно треба да имаш трпение да го склопиш секое малецко парченце и да добиеш нешто блиску до перфекција. Дури мака ми е да го носам брошчето, си мислам дека ќе ми се откачи, ту ќе ми падне некаде, па како што сум трапава и ќе го изгубам. Си го носам за посебни прилики, многу ретко и си го чувам во кутивче со ''перниче'', ма ко солза на дланка го пазам чудово и си ветив, дека некогаш ако имам ќерка ќе и' го оставам нејзе. Жално е, што лека-полека изумира занаетов, порано чинам поактуелни беа оние кои се бавеа со филигранството, сега скоро и да ги нема.
Дуќанот се вика Деко, се наоѓа близу до Грчка амбасада. Сопствеников Дејан е минеролог. Негов пронајдок е македонскиот рубин - драг камен со специфична црвено-розова боја кој го вградува во филигран. Филигранот му го изработуваат неколку девојки. Работи и по нарачка. Многу оргинално и преубаво.
Многу сакам филигран, а никој не ми подарил . Најмногу сакам обетки, веројатно затоа што обетки најмногу и носам. Често подарувам филигран - знам дека има многу што го сакаат, а веројатно и затоа што мене ми се допаѓа. Има еден дечко - Коте му е надимак, продава ланчиња со име како привезок на плоштад. Има многу убави филигрански обетки, а не му се изложени, ама главно ги носи со него. Прег некој ден се намерачив на едни, ама немав пари во моментот, а не ми се одеше до банкомат по ладното. Ама ќе го побарам, од глава не ми излегуваат обетките.
Обожавам филигран, му давам предност пред златото, сваровски кристалчиња и останати дрангулии. За мене филигранот е чиста уметност и заедно со бисерите ми се омилени парчиња накит. Поседувам ваков комплет, ова се обетките и со истиот мотив имам и привезок и прстен. Имам ист ваков идентичен пар обетки, ми ги направија лани по нарачка, цената изнесуваше 1500 ден. сама си се почестив и не жалам ниту денарче. Во живо се уште поубави и понежни. Прекрасни филигрански парчиња има во Рубин и цената им е сосем оправдана. Филигранот е тежок за изработка, бара трпение, време, талент и многу вештина. Во Македонија се организираат и филигрански курсеви, би сакала да посетувам некогаш, но сметам дека сум премногу нетрпелива и живчана за ваков тип на уметност. Во иднина би сакала да поседувам филигранска колекција од која ќе ми се врти памет. Ова е името на девојката која ги изработува.
Мислам дека филигранот повеќе им прилега на повозрасни жени, има некоја доза на зрелост во овие парчиња накит.
Имам пеперутка (брош) што баба ми и ја дала на мајка ми, една алка и прстен кој е премногу стар, дури среброто почнало и да темнее, сакав да ми го избелат и ми понудија да ми го откупат, ама нема шанси да го дадам. Не се во боја, ама многу убаво се изработени. Не се сложувам со ова има преубави изработки што на секого би му прилегале
Јас имам од мајка ми брошче, обетки и алка на која се сетив откако видов една слична слика од алка филигран, уште да знам каде е залутана алката Многу сакам филигран, не би се сложила дека е за возрасна жена, филиграни има за сечиј вкус, има и некои фигури кои се тинејџерски има и некои поелегантни. Најмногу ме привлекуваат брошчиња, обетки, нараквици, би сакала да поседувам и прстен. А некако не се мој стил ланчињата, големи и гломазни се, или евентуално не сум нашла некое по кое ќе копнеам А штом дремам пред гтц и чекам некој стално се лепам на излог на Рубин Кармин и зјапам филиграни Елена Ристовска е одлична баш и ги гледав филиграните. А ми се допаѓа многу Марија Милошевска па еве неколку нејзини дела
дали има некаде да се одржуваат курсеви за изработка на филиграни и која е цената, пишете ако знаете нешто pls
Преубав е, но за жал немам. Многу сакам да си купам барем едно прстенче само не знам како одат цените, скапички се нели? Мислам и дека вредат за парите, поради тоа што многу труд и време се внесува за секое парче.
Их, филигран. Имам многу дома. Наследство од дедо ми. Тој го правеше и продаваше. Има прекрасни парчиња, за сите возрасти и вкусови. Јас лично ретко носам. Не знам, не ми е толку едноставен за комбинирање и затоа го избегнувам. Кога носам најчесто бирам обетки или алки. Ланчиња не. И брошови. Е тие ми се најомилени и најубави. Пеперутчиња, цветчиња или недефинирани форми.. Нив најмногу ги сакам и најмногу ги носам.
Има некоја старинска убава жичка во филигранот - што просто ме фасцинира! А посебно ми се допаѓаат оние со камен. Милина. Истовремено им завидувам и ги сожалувам на оние кои го научиле овој занает. Прекрасно е да се знае да се направи вакво нешто, но мислам дека е и многу макотрпно. Како што сите жици се ситни, ако при составувањето нешто ти се мрдне, дупла работа ќе си имаш. Пред 1 недела си ги добив првите убетки .. и прекрасни се. Едвај чекам да си ги носам! Еве некои модели кои ми се допаѓаат. Нова е во ова но има преубави парчиња накит. Овој прстен ми е апсолутен фаворит. Ахх љубов!
Погрешно мислиш. Не се дискутира за вкус, филигран не стои на било какво парче облека и не му стои на секој, со возраст нема врска. Не личи некоја тетка од 50год да облече кожна панталона или деколте до папак ако е висната и сл... Јас пре би да носам филигран него скапоцени камења, но се зависи пак ќе кажам од стилот на облеката и поводот.
Обожавам филиграни. Постојано носам еден прстен, филигран - пеперутка, со години го немам извадено од прст. Имам доста филиграни, само таков накит носам, многу ретко се случува да ставам друг вид на накит. Имам другар кој ги изработува, така да ми прави се што ќе ми падне на ум а и (најважното) ми го наплаќа само матријалот и многу ми е ефтино
Обожавам филигран! Имам прстен од Рубин ама не сум нешто најзадоволна од квалитетот на материјалот (би требало да е сребро ама не ми делува дека е, нешто почна да се лупи...) и обетки што си ги купив од кај Младен Стојановски. Дечкото е гение! Дизајн, изработка, квалитет...немам зборови.
Во чаршија гледав за око прекрасни но не сум убедена за квалитетот. Дајте некоја препорака сум решила да си купам.
