Каква крема за лице користите?

А ги има овие од Биотен кај нас? Не сум ги видела до сега.

 

Од Vichy Normaderm ги имам користено течната пудра, кремата (Total Mat) и еден гел за миење со микрогранули.
Од кремата сум презадоволна; имам комбинирана кожа која на периоди станува мрсна, а поретко нормална. Ги користев во период пролет-лето, убедена сум дека не би ми одговарале во друго годишно време.
Кремата е доста хидратантна, баш имаш чувство како длабински навлегува во кожата, добро матира и не го затега лицето. Одлична е како подлога за било која пудра.
Единствена негативност е цената - не ми текнува колку точно ја купив, но беше околу 1000 мкд и тоа ми е навистина скапо за количина од 30мл. Да беше барем 50мл, ќе беше далеку поисплатлива опција.

Со пудрата сум на on-off; на периоди ми е одлична, а некогаш ми прави и лишаи, кога кожата ми е понормална и не ми се мастат критичните зони.
Ја имам најсветлата, има многу изразен жолт подтон и додека не ја избледнам убаво мава и на портокалово и изгледа смешно, но кога ќе се стопи со кожата, станува нормална и не се приметува. Она на кое „паднав“ кај пудрава, е тоа што изгледа многу природно и не се познава дека имам нанесено пудра дури и на дневно светло.
Негативно - има алкохол во составот и мириса многу нападно, на некои цветови (најверојатно има и парфеми), па постојано кивам додека ја нанесувам. Не исчезнува мирисот, некогаш луѓе ме прашувале каков парфем имам, а јас кутрата, не знам како да им објаснам дека тоа е всушност мојата пудра.
Mислам дека тоа е и причината поради која ми прави лишаи на носот, во периодите кога кожата во тие зони не ми е толку мрсна.

Гелот ми беше сосема во ред, но истиот ефект го добивам и со вакви гелови на Нивеа, Балеа, Гарниер и ним сличните, па покрај фактот што ми е прескап, тоа е и една од причините поради која не му се вратив повторно - ми беше нешто веќе видено.

Од Биодерма зелената колекција, имам користено крема (Sebium Hydra) и мицеларна вода.
Од мицеларната вода сум презадоволна, ја купив уште многу пати, дефинитивно е рај за ваква шекната кожа како мојата и многу убаво вади шминка. Дури и Ревлон Колорстеј и Клиник ги вадам во рекордно време. Малку е скапа, шише од 500 мл е околу 900-1000 мкд, но мене ми трае максимум 4, понекогаш и 5 месеци со секојдневно користење наутро и навечер.
Многу малку течност е потребно за да се исчисти лицето убаво, неверојатно добро ја освежува кожата, дава минимален мат ефект, без да го чувствуваш лицето затегнато.
Предобар производ е, посебно за оние со комбинирана или пак мрсна кожа. Прв пат после долги години наидов на моќен, а сепак нежен производ.

Од кремата и не сум толку задоволна, зашто иако е наменета за тој тип на кожа, мене лицето ми блескаше веднаш по нанесувањето и по некое време од тоа. Изгледаше како да не е впиена, иако јас чувствував дека е ок и дека лицето ми е во ред.
Не затега, не матира, доволно е хидратантна, меѓутоа не ми одговараше како подлога за некои од пудрите кои ми се наоѓаа по дома, ми делуваше како некој прајмер (не ги сакам толку многу) и имав нелагодно чувство дека пудрата ќе ми се „лизне“ од лицето.
Во однос на хидратантноста сум сосема задоволна, ама некако не ми ги исполни очекувањата со останатото и многу ме нервираше тоа што лицето ми изгледаше неуредно и масно во Т-зоната.

И јас сакам да пробам некои продукти од La Roche Posay, некако убедена сум дека најмногу ќе ми одговараат и ќе ми се допаднат.

 

@Miss.N, колку ја купи Леа кремата? Мајка ми ја има онаа другата за зрела кожа и многу ми ја фали, па баш се мислам дали да и` дадам шанса на оваа, вака како што читам, мислам дека би ми одговарала.

Повеќе не ми одговара Афродита од невен, па ја користам само ноќе, а Зиаја со екстракт од краставица ми е многу мрсна и тешко ми се впива.
Се мислам меѓу оваа и таа погоре постираната на Афродита. Иако, периодов ќе ми треба нешто баш за комбинирана кожа зашто ќе ми блеснува Т-зоната многу почесто.

 

Биотен се прокламираат како козметика без парабени, силикони и штетни состојки, ма да мене кремава не ми е ништо посебно, дури би рекла дека нивото на хидратација не е ниту половина од она на Нивеа од сликата погоре.
Нивеа си е Нивеа, барем мене повеќе ми одговара, кренав раце од кремите на Биотен и продолжив да ги користам тоникот, млекото и средството за вадење шминка околу очи, од зелената колекција.
Одлични се!