Колин Хувер (Colleen Hoover)

Колин Хувер верувам дека ни е позната скоро на сите.
Станува збор за Американска авторка, која последниве неколку години буквално „растури“ со прекрасни книги кои несомнено, со право станаа бестселери.

Обично обработува young adult/new adult-приказни испреплетени со романса и мала доза на мистерија (можеби, така ја доживувам јас).

Според мене, Колин е една од ретките автори на денешницава, кои навистина знаат како да исткаат содржајна приказна без фалинка и да успеат да го задржат читателот заинтересиран од почеток до крај.
Не знам за вас, но јас буквално не трепнувам додека не прочитам нејзина книга до крај.
Има нешто во нејзиниот начин на пишување што те тера да продолжиш да читаш и да ја свртиш наредната страница, па наредната, па таа после неа и сè така дури не стасаш до самиот крај.
Многу сакам вакви автори, кои нема потреба да создадат ликови кои ќе кукаат и лелекаат, за да предизвикаат емоција кај мене, туку самата нивна приказна те носи во некој друг свет, па ти доаѓа да го гушнеш главниот лик, да му понудиш кутија паломи и да плачете заедно до заоѓање.
Е, тоа веќе се вика умешност.

Кај неа не постојат куп начкрабани зборови склопени во некои досадни дескриптивни реченици; никогаш не ми е досадно кога читам нејзини книги. Приказните кои ги обработува се баш секојдневни и опипливи, опфаќа многу интригантни теми и поттикнува многу дискусија.
Но, и покрај тоа, Колин Хувер е светлосни години далеку од авторките на лесни чик-лит приказни, со тоа мислам дека ќе се согласиме сите.

Досега имам прочитано три книги од неа: November 9, It Ends With Us и Ugly Love. И во план ми е да ги прочитам сите. Никогаш доста од Колин Хувер!

Дефинитивно, без грам сомнеж, најомилена ми е It Ends With Us.
Тоа е книгата која ме потресе, ме освести, ме замисли, ме натера да се заљубам во главните ликови - ма се заљубив во целата книга!
Досега не постои книга од која немам извадено повеќе цитати. Имаше премногу убави мисли, толку едноставно и малку, а со тие неколку збора веќе е кажано сè.
Исто, тоа е единствена книга во последниве неколку години која ја прочитав два пати.
Задолжително четиво за секоја жена на планетава, така би ја нарекла.

Со оваа книга Колин Хувер дефинитивно ме освои и признавам - отсега па натаму ќе бидам пристрасна за секоја нејзина идна книга која ќе ја прочитам.

Кои книги ги имате прочитано од неа?
Често среќавам нејзини книги низ темите за читање, па мислам дека ќе имаме фина дискусија на темава.

Во прилог, листата на сите нејзини досега издадени книги:

Спојлер: Книги

• Slammed (2012)
• Point of Retreat (2012)
• This Girl (2013)
• Hopeless (2013)
• Losing Hope (2013)
• Finding Cinderella (2014) novella
• Maybe Someday (2014)
• Maybe Not (2014) novella
• Ugly Love (2014)
• Never Never (2015) three-part novella series with Tarryn Fisher
• Confess (2015)
• November 9 (2015)
• Too Late (2016)
• It Ends with Us (2016)
• Without Merit (2017)

 

@sweet-cherry
Мислам дека го нападнав скроз Гудридс тогаш кога ја завршив книгава и ги излајкував сите quotes извадени од It ends with us.

Мене омилен цитат ми е овој од сликата. Преубава мисла.


А фразата ' just keep swimming' ми стана мото.

 

Имам речиси сѐ прочитано што произлегло од нејзината имагинација.

Имаше неколку книги поради кои ќе се откажев од неа. Too late, тешка, тешка глупост, Confess исто не ми се допадна, November 9 сосема просечна книга. Како може нешто толку добро и нешто толку просто да има напишано една иста жена не ми е јасно.
It ends with us ми е апсолутно омилена книга од неа, има толку емоции, толку вистина во книгата, ликовите се страшно реални. За разлика од други кои може да ги има само во книга и немаат допирна точка со реалноста.

Инста љубовта страшно ме иритира, ме иритира итоа што има многу незрели ликови, а се обидува да ги протурка како длабоки и мистериозни.

Ја читам најновата моментално, All your perfects, сум негде до половина. Бледа копија на ова завршува со нас, се обидува длабока тема да обработи, но не успева во тоа. Приказната е развлечена, ликовите неинтересни и бледи. Ниту форматот ми се допаѓа.
Штета.

 

Мислењето е одамна, ама да прашам - зошто не ти се допадна?

Мене многу ми беше убава, баш во нејзин стил.
Многу емотивна и многу сè - вистински ураган од емоции, ама да, имаше нешто што фали за да биде бомбастична. Мене конкретно ме нервираа ликовите.

Плус, еден момент од целата книга многу ме изнервира и тоа придонесе да имам една голема замерка, веројатно претпоставуваш кој и не знам како Колин која толку гласно збореше за едно на почетокот, ја трансформираше Quinn во личност која...како да опишам...

Спојлер

стана нешто од кое и самата бегаше.

Затоа и не и' дадов висока оценка, после тоа некако ептен ми се скрши филмот.

Спојлер

Женава прости неверство (без разлика што беше такво какво што беше), со глупо оправдување дека самата таа е крива за неговото однесување, јеа рајт.
Нонсенс ми беше тоа и сакав да ги нашамарам и двајцата.

Се дупнав од плачење, пресвртот и крајот не ми беа баш по мој вкус, ама многу убаво ги опишала сите struggles со сам себе, преиспитувања, себеобвинување, итн...не сум во иста ситуација, ама сум се соочила со такви депресивно-анксиозни мисли низ минати врски и едноставно се пронајдов во многу работи кои ја мачеа Quinn - воглавно во барањето вина во себе, фокусирање само на најлошите работи, премотување на едни исти црни мисли и не оставањето простор да согледаш дека си нешто многу повеќе од тоа...

Не ми се допаднаа главните ликови. Прв пат до толку да ме иритираат и двајцата, а во исто време да не можам да останам рамнодушна на приказната и на нивната голгота. Многу сочувствував низ целата книга, многу ми беше тажна.

А и самата приказна ми беше многу читлива, ептен брзо ја „пројдов“ книгата, а успеав да ги впијам сите детали, што досега ретко ми се случило, морам да признаам.
Краен заклучок - има работи кои не ми беа по вкус, но книгата и нејзината порака ми се допаднаа многу.

Има прекрасни цитати, не знам кој прв да го издвојам.

Спојлер

Во овој посебно се препознав, можеби затоа што уште си носам траги од „демони од минатото“,па затоа и толку многу ме погоди и книгата...