мене ако ме прашуваш, поголем е ризикот од сомнителни инвеститори, не знаете колку луѓе имаат отплатено стан, а не можат да добијат имотен лист по 10 години, затоа што пропаднал инвеститорот. не е ништо страшно тоа со сметки и данок, се расчистува пред потпишување на договор обично.
Ние купивме стан од личност и немаше никакво чекање околу плаќање на данокот. Буквално во петок однесов документи, следниот петок ти стасува порака дека ти е изготвено решението, одиш да го земеш за да можеш да одиш да платиш. Плаќаш и они ќе добијат известување па на крај уште еднаш се враќаш да си го земеш решението дека си платила. Еве и доказ. Поголем е ризикот од купување нов стан, знам луѓе што немаат земено имотен лист по 10 години живеење во истиот.
Добро, а ако купувате стар стан, дали барате тие да донесат потврда дека сите сметки се платени? Еве другарка ми продаде куќичка на Албанец од ДУИ, и човекот е на видна позиција, нема да дозволи да го зезаат, им бараше да си извадат во сите ЈП дека не должат ништо, дека не должат даноци итн. Додуша другарка ми рече, ако фатиш добар адвокат, тој ќе ги заврши сите работи. Инаку, колешка работеше на Блиски Исток, купи стан од инвеститор, испадна дека тој кат инвеститорот си го доградил на диво, се жалеше нешто за имотни листови итн, што секако е исто ризик, зезнат си секако, ем куп пари ќе дадеш, ем не е работата чиста како што си сакал. За стар стан, што ако е под хопотека, не е чист имотниот лист, тоа адвокатот го проверува или вие лично самите? Да си биде човек 100% сигурен. Не се купува недвижен имот секој ден.
Сѐ мора да се прави со адвокат, ништо сами, сепак се работи за имот и поголема сума на пари. Ние уште од почетокот кога решивме цела постапка да ја тераме, со адвокатка. И она ни проверуваше дали имаат хипотеки, чист имотен лист итн.
данок не можеш да платиш пред да е платен за сите години уназад, не ти проаѓа во град скопје, за воопшто да можеш да завериш на нотар, а за сметки, јас обично ставам одредба во преддоговор/договор, на денот на солемнизација на нотар да носат потврди дека се расчистени, работам како адвокат, а и сама купив стар стан, можам од искуство да ви кажам дека не се купува од секого, има некои должат по 20 години сметки, извршители итн, сам си го проценуваш човекот. конкретно ние имавме избор на иста локација за помалце пари да купиме поголем стан, ама ликот беше сомнителен, имаше извршители, долгови, се одлучивме за поскапиот, ама се гледаше дека луѓето се на место, така и си беше, се си расчистија сметки пред да го купиме станот, немавме никаков проблем.
Во право си, не се купува од секој. Треба да се види што човек е, да се процени, па и да се распрашаш за него, ако можеш. Има и сега по огласи сомнително ниски цени за станови, значи мора да има некој проблем, некако не делува сериозно толку под цена некој да нуди стан на пример. Или е ммногу крш на терен да се отиде да се види, или имаат некој зор што толку под цена нудат нешто. Во секој случај треба и малку среќа да имаш да си најдеш имот на локација која ти одговара, цената да одговара и да е пристојно место за живот, да немаш многу главоболки.
како и да е ако се решиш, ќе си фатиш адвокат од почеток, он ќе ти тера се, а за тоа од кого ќе купиш стан, тука адвокатот не може ништо, останува на тебе. ние правевме секакви комбинации, со дел од парите да му ги затвориме сите долгови, ама пак не ми беше сигурно, некогаш има извршители што чекаат, ќе тргнеш еден, во тие неколку дена што се чека упис на твое име, може друг да се закачи, ликот беше таков чуден лик, на крај краева, не знам утре кој ќе ми чукне на врата да го бара, затоа се одлучивме за поскапиот стан, луѓето толку си беа фини, што еве до ден денес си живееме со нив.
Апсолутно ќе си побараш картица од сите комуналии во станот, мислам дека можеш и сам да го направиш тоа, ама и тој што продава мора да соработува, па може и тој да извади, таму се гледа дали има заостанати долгови. Хипотека се гледа на имотен лист, не може под хипотека да е, а да не е наведено во имотен. Адвокат секако мора, ама овие работи ќе ги научиш и по пат додека купуваш стан па ќе си ги провериш сам. Каде е поголем ризикот, не знам искрено што да кажам. Ова со доградба на последен спрат или поткровје во новоградби, кој не е внесен во проект, го има и низ Скопје и нормално немаат имотен. Ама кај нас има и еден куп целосно вселени згради со месеци/години кои немаат имотни... Исто знам за случај со стар стан и чист имотен лист, каде отпосле се јавува некој наследник на тој имот кој не бил внесен претходно и излегоа проблеми, се решава правно, ама доволно е да те изремети.
По сето ова што читам, и што си размислувам, можеби е најпаметно од сериозен инвеститор, нов стан, ама навистина сериозен некој што гради со децении и каде ризикот за утка е мал. Со примерот што го спомна, доволно е да те изремети некој со таков проблем, си дал куп пари и сега се јавува некој наследник и треба да се влечкаш по адвокати, судови, што секако ќе те чини време, стрес, пари. Некој лабилен и со здравствени проблеми, срцев удар или мозочен има да добие од таков стрес. Или се случува луѓе да купуваат стан сосе мебел, баш роднина така купи, наместен стан, и испадна дека од наместен, стариот газда сепак си земал дел од мебелот, дури роднинава се изнервира до степен да каже „ќе му го оставам станот, не го земам бе“, но пак го зема. Ова е Македонија, врските работат секаде, што ако некој ти извади сметки дека се е платено, а да не е. И глупаво и нелогично е утре да мачиш мака поради стари сметки. Си има извршители, нека го бараат и нека му наплатат на стариот должник. Живееме во несредена држава и затоа постојат и ризици.
Не може да извади со врски дека нема заостанати долгови, тоа е документ издаден со печат и потпис од фирмата и фирмата стои позади тоа не е баш ништовен и те штитат правата. И кај инвеститор што гради со децении сешто може да се деси и не е никаква гаранција за ништо. Сега кога ќе се размислам можеби најсигурен начин за купување стан е да го земеш со хипотекарен кредит, банката не би се изложила на ризик да се појави некаков си спор, односно го мери ризикот и прави процена дали ќе ти даде или нема да ти даде кредит врз основа на тоа.
За купување на стан во градба (новоградба), има многу работи што треба сериозно да се проверат, не е само “ми се свиѓа станот и локацијата”.Најважно од сè е инвеститорот. Прво, проверете колку години гради, каква репутација има и како котира на пазарот. Денес тоа е многу полесно има интернет, форуми, искуства од луѓе.Видете каде има градено, дали тие згради се завршени на време, каков е квалитетот и дали има проблеми со станарите. Многу важна работа што луѓето ја прескокнуваат: проверка на парцелата. Парцелата треба да гласи на инвеститорот или да има чисти имотно-правни односи. Ова се проверува во катастар. Ако тука нешто не е чисто веднаш е црвено знаме. Понатаму, проверете дали има одобрение за градба (градежна дозвола) и дали проектот што ви го продаваат се поклопува со тоа што е одобрено. Не купувајте “на збор”. Исто така, обрнете внимание во која фаза е градбата. Колку е порана фазата, толку е поевтино ама и ризикот е поголем. Затоа гледајте инвеститорот да има реални рокови и историја дека ги почитува.Не верувајте слепо на рок “готово за 12 месеци” ако реално тоа не е возможно. Договорот е клучен читајте сè. Дали има пенали ако доцни инвеститорот? Дали има јасно дефинирана квадратура, кат, паркинг место? Што точно добивате внатре (подови, врати, прозорци, греење)? Сè треба да биде напишано, не усно. Исто така, проверете како ќе оди плаќањето во фази според изградба (што е најбезбедно), а не сè однапред. На крај, не брзајте. Стан се купува еднаш (или барем не често) и подобро е да проверите 10 работи повеќе отколку после да имате проблеми со години.Секогаш би одбрал нов стан од колку стар.Ново си е ново
Целосно се согласувам, проверување и распрашување. Има и инвеститори што биле звучни имиња и убаво граделе, сега имаат проблеми да најдат мајстори, па градат на 2-3 локации со една иста група мајстори и на крај доцнат со рокови.
Девојки дали некој од вас има купено стан во зградата Urban Residence на Golden Art и Mega Akustik до Американ Колеџ во Аеродром?
