Синопсис : Spoiler Кога сите ние би знаеле дека напуштените, стари куќи секогаш носат проблеми, а душкањето по туѓи предмети уште поголеми, никогаш не би се родиле возбудливите тинејџерски приказни. Па така, Оскар Драј – 15-годишно момче пораснато во интернат, лутајќи по улиците на Барселона завршува токму таму каде што не му е местото. На туѓ имот, во туѓ дом и со часовник во џеб којшто сигурно не е негов. Но кој би рекол дека токму тоа непромислено дело ќе го донесе до двајца прекрасни пријатели, незаборавна љубов и приказна од која лазат морници по целото тело? Оскар ја запознава убавата Марина, неговата придружничка во оваа возбудлива приказна и двајцата, неочекувано, но можеби малку намерно, завршуваат како дел од историја која се повторува и која им ги менува животите засекогаш. Марина, надежна писателка во потрага по нова мистерија го носи својот пријател во запуштените градини на едни стари гробишта, омилената дестинација на тинејџери во потрага по проблеми. Таму заедно набљудуваат еден чуден ритуал кој се случува секоја четврта недела во месецот. Старата кочија повторно се приближува до гробиштата, дамата со темна наметка и покриено лице повторно носи една роза и ја остава на безимен гроб. На надгробната плоча е изгравирана само една пеперутка. Оскар и Марина се решаваат да ја следат и тука започнува лудата и опасна игра на таинствениот Михаил Колвеник, на борбата против смртта, подвижните силуети кои демнат од темни агли и подземниот свет на Барселона низ нејзините канали. Никоја книга досега не ми оставила олку силен впечаток ! После оваа мислам дека ретко ќе се најде некоја која ќе ја побие. Какви се вашите доживувања од авантурата на Оскар и Марина ?
браво за изборот! Марина спаѓа во листата на моите 5 омилени книги. Начинот на кој е пренесена сликата за Барселона, за ликовите, заплетот... се е совршено!
Маринаааа, Маринаааааааа Кога ја читав, имав претходно прочитано и други книги од него и мислам дека веќе се навикнав на неговиот стил, на неговата моќ за опивање. Книга која ќе ми остане во сеќавање. Крајот не очекував да биде таков и многу ме растажи. Посебно делот со писмото кое го пишува. Си го препишав во тетратката со цитати и често си го читам.
Го одолговлекував читањето на оваа книга - што од немање време од презафатеност со други работи, што од неподготвеност да ја дознаам приказната што се крие внатре, па конечно ја прочитав денес. Морам да кажам дека книга со вака добра содржина не сум читала одамна. Ми остави голем впечаток. Буквално не ја пуштив од рака. На моменти бев повозбудена и понапната од неизвесноста и од самите Оскар и Марина. Развојот на дејството, заплетот, па неговото разрешување, живото опишување на ликовите и локациите и целата мистерија што ја обвива приказната се феноменални и сами по себе ја креираат сликата во главата на читателот. Жал ми беше што заврши тажно.
Ја добив Марина за подарок, и на почеток не се ни нафаќав да ја читам, едноставно насловот ми беше многу досаден Ама јас и мојата досада, немав друго што да правам..и седнав да ја читам. До тогаш не бев запознаена со стилот на Зафон, и можам да кажам дека останав е баш ваква . Ја прочитав во еден ден! Неможев да ја оставам, сакав само да знам што понатаму ќе се случи. Книга, книга и пол!
Како да не беше доволно тоа што книгата сама по себе е морничава, па викендов додека ја читав на тераса, почна да ми прелетува една црна пеперутка околу мене Адмирал пеперутката (или на латински Vanessa atalanta) се појавува во доцна есен и рана пролет, и лично мене ми е една од поубавите пеперутки на нашево поднебје. Многу пати ја имам фотографирано, ама сега баш и не ми беше симпатична... Сред бел, сончев ден мене ме фати некоја језа, морници почнаа да ме лазат. Туку, да се навратам на книгата - ова ми е прва книга од Зафон што ја читам, и иако самиот вели дека од неговите книги оваа му е омилена, уште две негови дела се најдоа на мојата листа за читање. Ми се допадна начинот на кој ги опишува сцените и на моменти можев толку многу да се соживеам со настаните, што ми се чини дека почнав да ги доживувам истите чувства како и ликовите. Приказната го задржува вниманието, а особено ми се допаднаа описите на Барселона што се провлекуваат низ авантурите на Оскар и Марина. Додека ја читав, имав чувство како да сум таму. Би му ја препорачала на секој кој сака да прочита интригантна приказна раскажана на виртуозен начин.
All time favorite. Имено го обожавам Зафон, сите негови дела, секој роман е приказна самата за себе, но кон Марина сум посебно приврзана. Ја имам читано неколку пати, секој пат ја доживувам поинаку од претходниот, на поразличен начин, со поинтензивни чувства. Веројатно и никогаш нема да ми здодее. Барем се надевам. Го има сето она што го барам- совршено разработена приказна, силни ликови, неочекуван заплет кој со себе носи трагична нишка. А да, и ретко добра корица Патот до пеколот е поплочен со добри намери. - Марина, Карлос Руиз Зафон
Си ја купив од саем по препорака на другарка, и навистина не зажалив! Ја прочитав буквално за еден ден, почнав да ја читам навечер и не спиев затоа што едноставно не можев да ја оставам. Премногу ми се допадна бидејќи имаше неизвесност до самиот крај, предобра содржина и прекрасни описи. На повеќе наврати плачев заради книгава, толку се соживеав, и кога ја завршив се чувствував како да сум изгубила дел од мене... Секому ја препорачувам, посебно на љубители на мистерии, како мене. Оваа е првата книга што ја читав од овој автор, но дефинитивно ќе следуваат повеќе.
