Правејќи грев, телесниот човек не ги доживува неговите последици онака како што ги доживува духовниот човек. Телесниот човек не забележува некои особени промени во својата душевна состојба по сторениот грев, бидејќи постојано се наоѓа во духовна смрт, и затоа што не го познава вечниот живот на духот. Меѓутоа, духовниот човек, при секое приклонување на својата волја кон гревот, ја забележува промената на својата душевна состојба поради намалената благодат. Старец Софрониј Сахаров
Велиш дека постиш? Убеди ме во тоа со делата! А кои дела се тоа? Ако здогледаш сиромав, подај му милостина. Ако се најдеш со својот непријател, смири се со него. Ако здогледаш на улица убаво лице, одврати го својот поглед од него. Значи, не само да постиш со стомакот, туку и со очите, слухот, и со рацете и нозете, и со сите членови на своето тело. Рацете нека постат воздржувајќи се од секаква алчност и кражба. Нозете нека постат така што нема да одат по патеките на гревот. Очите нека постат така што нема страсно да се загледуваат во убавите лица, ниту, пак, со завист ќе гледаат на добрата кај другите луѓе. Велиш дека не јадеш месо. Но, чувај се со похотливите очи за да не го голташ она што го гледаш околу себе. Пости и со слухот, не слушајќи оговарања и сплетки. Со своите усни и јазик пости, воздржувај се од грди зборови и шеги. Каква ни е ползата ако не јадеме месо и риба, а ги гриземе и јадеме своите ближни. Свети Јован Златоуст
Текстов е преземен од bigorski.org.mk Имаше во рајот два ангели кои Бог ги задолжи за врската помеѓу Него и луѓето и тие имаа за задача да ги пренесуват до Бога пораките и молитвите на луѓето. Едниот непрестајно леташе горе – долу, а другиот си почиваше на еден облак. Еден ден, оној кој постојано седеше без работа, го праша другиот: – Добро, што правиш толку, што работа имаш па не застануваш ни за миг воздух да земеш? Само кружиш горе – долу… – Имам многу работа, брате, бидејќи јас сум оној што Му ги носи на Бога молитвите на луѓето, кои започнуваат со: ,,Господи, дај ми’’. А ти, што правиш тука, легнат на облакот по цел ден? Зошто постојано одмараш? Толку ли немаш што да му однесеш на Господа? – Немам – тажно одговори ангелот. Знаеш, јас Му ги носам пораките на луѓето кои започнуваат со: ,,Ти благодарам Господи…‘‘
