Кога тешкотиите на животот, горчините на душата, немоќите на нашиот внатрешен свет, болката, радоста – ни ја одземаат секоја надеж, духовна или човечка; кога очите наши стануваат суви од чекање и накрај не гледаат ништо; кога телото наше, кое е храм на Бога, станува ’како мев во слана‘, кожа што паднала во слана, замрзнала и ја изгубила бојата до таа мера што не можеш да препознаеш дали воопшто постои; кога животот ми станува таков што ме тера да чувствувам дека моето битие е исушено, дека сум заборавен од љубовта на луѓето, на ангелите, на светиите; дека сум изгубен и барам од Бога малку освежување, малку одмор – а Бог не ми дава ништо, и се чувствувам како урнатина од живот… Тогаш вреди да се верува. Архимандрит Емилијан Симонопетриски
Сиромашни, сираци, скитници, бездомници, болни, тажни, грешници, не тагувајте: имате Мајка, Мајката Божја! Мајка, Која ќе те прегрне во лутањата, Која ќе те храни во сиромаштија, Која ќе ти даде утеха во тагата, исцелување во болести, ослободување од заробеништво, простување на гревовите. Свети Илија (Мињати)
Мажот треба да ја сака својата жена како што Христос ја сака Црквата. Да ја штити, да се грижи за неа, да и дава сигурност, особено кога е вознемирена, кога е болна. Знаеме, на крајот на краиштата, колку е чувствителна женската душа, поради што, како што вели апостол Петар, „како најслаб го изговара женскиот дел“. Женската душа е ранлива, многу лесно се менува, наеднаш очајува. Затоа мажот мора да стои полн со љубов и нежност за да стане нејзино богатство. старец Емилијан од Симонопетра
Е синко мој, дојде лудо време. Син ја тепа мајка си, сестра ја зема куќата на брата си, црквите се празни во недела, соседите не разговараат меѓу себе. А кога бев дете, татко ми прво седнуваше да јаде, а потоа ние. Во мое време татко ми беше светост, а мајка ми столб на куќата. А сега кога децата зборуваат за своите родители велат дека се досадни и дека ги гушат. И запомни, синко, слогата гради куќа, а раздорот ја урива. Свети Пајсиј Светогорец
Скриениот грев За време на постот, по литургијата, на која многу луѓе се причестија, свештеникот излезе од олтарот и сите мислеа дека, како што беше обичај, ќе одржи проповед. Наместо тоа, тој повика мало девојче од толпата верници и го постави до него на говорницата. Овој чин ги натера сите собрани во храмот да го напнат слухот и видот. Свештеникот гласно објави: „Сега ова девојче, четиригодишната Леночка, ќе одржи проповед, слушајте ја“. Проповед? Како треба да се разбере ова? Свештеникот јасно ги збуни своите парохијани со некои многу неразбирливи зборови. Но, Леночка одржа проповед, и тоа засекогаш врежано во сеќавањето на нејзините слушатели. Се испостави дека за време на службата девојчето ги видело ангелите чувари на оние парохијани кои се причести ја со Светите Тајни. Во нивна близина беа ангелите на некои од нив, додека ангелите на другите стоеја на далечина и плачеа. Додека зборуваше за ова, девојчето одеднаш почна да ги именува имињата на оние што се причестиле и да покажува кон нив. По една таква необична проповед, свештеникот им се обратил на народот: „Оние чиј ангел плачеше, се причестија на осуда“. Сè уште имате непокајани гревови. Кој сака нека дојде кај мене и пред сите да го признае својот скриен грев, тогаш Господ ќе му прости. Многумина од оние што ги посочи Леночка беа погодени од Божјиот укор и, отфрлајќи го лажниот срам, јавно се покајаа за гревовите скриени во исповедта. Свештеникот е Свети Серафим Вирицки
Зошто Господ го избрал Јуда за свој ученик и ако знаел дека ќе Го предаде? Да покаже дека Христос ги повикува и прифаќа сите, но не сите Го сакаат. Старец Ефрем од скитот на Свети Андреј
Само со Светата Причест можеме да ја оттргнеме власта на ѓаволот над нас. Исто така, имам видено многу - психички и физички болни луѓе, на кои после причестувањето им беше подобро. Човекот кога ќе добие човечка крв му е подобро, а замислете што се случува кога ќе ја прими Божествената Крв! Старец Пајсиј Светогорец
Живееме во време кога многу знаеме за молитвата, а малку се молиме. Јадеме посна храна, а не постиме. Ги исповедаме гревовите, а не се каеме ! Одиме во храмот и стоиме на служби, а нашата душа не се смирува пред Творецот! Сето ова е поради тоа што срцето ни е затворено... Потребно е да го отвориме, Христос да се смести во Него. Старец Пајсиј Светогорец
Не заборавајте дека првиот човек што отиде во рајот беше разбојникот на крстот, а првиот што отиде во пеколот беше апостолот Христов кој го предаде. Затоа никогаш не зборувате за некого: „Тој пропадна"! До последната секунда од животот, човекот има шанса да се промени. Митрополитот Лимасолски Атанасиј
Смилувај се, Сине Давидов, спаси и помилуј ме, Ти, Кој со збор бесомачните ги исцели. Со умилен глас речи ми како на разбојникот: “Амин! Вистина ти велам, со Мене во рајот ќе бидеш, кога ќе дојдам во славата Моја!” Едниот разбојник Те хулеше, а другиот како Бог Те славеше, обата на крстови висејќи. Но, о, Милосрден, како Твојот верен разбојник, кој во Тебе Бога Го позна, и мене вратата на славното Царството Твое отвори ми ја. Сета твар трепереше распнат гледајќи Те, гори и камења од страв се распаѓаа, земјата се колебаше, пеколот се разголуваше и светлоста дневна се помрачуваше, гледајќи Те Тебе, Исусе, со тело прикован. Не барај од мене плодови достојни на покајание, зашто силата моја во мене исчезна. Дарувај ми секогаш срце скрушено и смирение на духот, за Тебе да Ти ги принесам како жртва пријатна, единствен Спасителу. Судијо мој и Познавачу мој, кога повторно со ангелите ќе дојдеш на светот да му судиш, поштеди ме тогаш, гледајќи ме со Твоето милосрдно око, и уштедри ме мене, Исусе, кој секоја човечка природа во гревот ја надминав. (од покајниот канон на св Андреј Критски)
Ако Христос ја имаше световната логика што ја имаат денес многу „духовни“ луѓе, немаше да го остави Својот Небесен Престол за да се спушти на земјата, да трпи распнување од нас, бедни луѓе. Меѓутоа, во овој – човечки кажано – „неуспех“ на Христос беше скриена тајната на спасението на сите луѓе. Но, ние се стремиме кон христијанство без распнување, за „христијанство на непосредно воскресение“. Ние го преправаме христијанството онака како што сакаме. Не сакаме да се ограничуваме во ништо. Меѓутоа, за да го доживееме натприродното, мора да живееме надвор од природното. Свети Пајсиј Светогорец
„Оној, кој се моли и пости, има две крила, полесни од ветрот. Тој е побрз од огнот. Само тој може да ги победи демонските сили, бидејќи нема посилен од оној, кој искрено се моли и пости“ Свети Јован Златоуст!
Во оној ден кога паднал Адам, дошол Бог, и одејќи во рајот, го видел Адама, се исполнил со жалост и му рекол: “Имајќи толку големи блага, како можеше да го избереш злото! По таквата слава, како го носиш врз себе срамот! Зошто си сега така помрачен, без никаков вид? Зошто си извалкан? По таквата голема светлина каква темнина те покрила! Кога паднал Адам и умрел за Бога, Создателот зажалил по него; ангелите, сите сили, небесата, земјата, сите созданија ја оплакувале неговата смрт и неговото паѓање. Зашто сите созданија виделе дека оној што им бил даден за цар, станал роб на спротивната и лукава темнина; дека се облекол со темнина, со темнина лукава и горчлива ја облекол својата душа и кај него се зацарил кнезот на темнината. Тој бил оној патник што бил нападнат од разбојници, покриен со рани и оставен полумртов, кога одел од Ерусалим во Јерихон. (30,7). Свети Макариј Велики
Кога ќе видите свештеник како ви ги подава Даровите, знајте дека… Христос е тој што ви ја подава раката. Свети Јован Златоуст
Горделивоста не ѝ дозволува на душата да зачекори по патот на верата. Еве еден совет за неверникот: нека рече – Господи, ако постоиш, просветли ме, и ќе Ти служам со сето мое срце и душа. Поради ваквата смирена мисла и подготвеноста да Му служи на Бога, Господ ќе го просветли… А тогаш неговата душа ќе Го почувствува Господа; ќе насети дека Он ѝ простил, дека ја љуби, и сето ова ќе го познае од опит, а благодатта на Светиот Дух ќе ѝ посведочи на душата за нејзиното спасение, и тогаш човек ќе посака на сиот свет да му објави: „Колку многу нѐ љуби Господ!“ Св. Силуан Атонски Преку искушение, Господ сака: 1. Да му даде на човекот искуство. 2. За да може човек да се поправи, да размисли за причината поради која бил искушуван. 3. За да може човекот да се исчисти, да ги признае своите гревови и да се обиде да не ги повтори. Свети Гаврил Грузијски
Што и да ве снајде во животот, никогаш не го дочекувајте тоа со гордост, затоа што добрите дела ги правиме со гордост, а и злото го правиме со гордост. Научете го смирението од Богородица. Нејзината големина лежи токму во нејзината понизност. Најдете го ова смирение - тогаш ќе ја разберете љубовта кон животот, ќе имате големо духовно богатство, навистина ќе бидете големи духовни луѓе. Ако не го најдете ова духовно богатство - смирението - сè ќе биде залудно. Ќе бидете како меур од сапуница: кој расне и расне, и пука – и има само празнина. Нека не ве снајде ова искушение! Што и да се случи, прифатете го со понизност! Ликот на Пресвета и смирена Дева Марија треба постојано да биде пред вашите очи во текот на вашиот живот. И Мајката Божја, скромна, но величествена во ова смирение, нека ни биде Помошничка и Покровителка на сите нас. Амин. Схиархимандрит Зозима Сокур
Често, искушенијата самите си ги создаваме, кога сакаме да се издигнеме самите себе си над другите.На небото никој не се качува со световно качување, тку со духовно слегувње.Кој оди ниско, секогаш оди сигурно и никогаш не паѓа.Оној што не се советува при својот духовен од, ги меша патиштата, многу се заморува и заостанува.Ако не се смири да праша, макар и подоцна, тешко дека ќе стигне до целта.Додека пак, оние што се советуваат го минат патот одморени и под закрилата на Божјата благодат. Старец Паисиј Светогорец
"За човек да почуствува спокој, треба да ја исфрли нечистотијата од себе, а тоа се случува со исповедта.Човекот, отворајќи му го срцето на духовникот и кажувајќи му ги своите гревови, се смирува и со тоа ги отвора небесните врати, низ кои му доаѓа богатата Божја благодат и го ослободува". Старец Паисиј Светогорец
