„Самоглас“ е првата платформа за пласирање на аудио книги на македонски јазик. Платформата претставува веб апликација за пристап до аудиотеката (аудио библиотека) која е нов модел за претставување на литературни содржини на македонски јазик. „Поттикнати од постојаниот пад на просечните оценки на учениците сакавме да донесеме услуга која постои веќе некое време на глобално ниво. Овозможувајќи и олеснувајќи пристап кон литературна содржина за сите. Не само за оние кои сакаат да слушаат аудио книги, туку и за оние на кои им е нужно потребно како лицата со инвалидност, слепите и слабовидни лица, како и лицата со дисклексија,“ вели Христијан Поп-Симонов од „Самоглас“ . Покрај Христијан зад идејата на „Самоглас“ се и Ангела Стојановска и Васко Костовски од Здружението за афирмација на уметноста „Флуктус“ чиј проект е поддржан од Министерството за култура. Сите тројца се млади актери, дипломирани на Факултетот за драмски уметности – Скопје, и покрај реализацијата на самата платформа, тие и ги позајмуваат гласовите за читање на книгите, пишува Радио МОФ. Моментално, „Самоглас“ е достапен само преку својата веб верзија, но од тимот велат дека напорно се залагаат за изработка на апликација за мобилни уреди. „Самоглас“, може да се следат и на нивните официјални профили на социјалните мрежи Facebook и Инстаграм. Извор - точка.мк За мене ова е проект за почит. Кога пешачам сама слушам книга, а последниве вечери им пуштам на децата за заспивање. Сеуште не сте регистрирани? https://www.samoglas.mk
Супер идеја, се создаваат и повеќе работни места за македонистите, или барем би сакала да верувам дека тие ќе бидат тие кои ќе ги читаат книгите на правилен македонски јазик, без скопски нагласок, што воедно би влијаело на подобрување на нашиот изговор во формална комуникација .
Ектремно добра идеја, конечно платформа за аудио книги на македонски. Нон-стоп мултитаскинг-увам со подкастови, така да, ова е одлично за мене! Одамна се регистрирав и ми се допаѓа како функционира. Гледам и доста брзо додаваат нови книги.
Одамна постои ова надвор од границите на Македонија и никогаш не ми се допаднало како идеја. Книгата треба да се фати во рака и самостојно да се прочита, да се развие способноста за развивање на имагинацијата, да се развие способноста за совршено изразување на замислените идеи и да се зголеми вокабуларот. Со платформава ништо од горенаведеното не се постигнува. Да сакам да слушам ќе пуштам филм, и така веќе поголемиот број четива се адаптирани во филм.
На страната на Националниот сојуз на слепи лица на Македонија има голем избор на аудио книги. Голем дел од нив се лектири за основно и средно, ама има и многу други. http://nssrm.org.mk/category/audio-knigi/
Ама не си само ти саде сама на светот Аудио книгите се посебно потребни за слабовидните и многу корисни за учење нов јазик (без разлика дали странци учат македонски јазик или ние учиме странски јазик). Особено од помош во усвојување на акцент и изговор. Јас на пример ретко гледам филмови, во новиов стан со месеци немав телевизор воопшто и аудио книгата е одлична кога сакаш нешто да прочиташ, а си отепан и очите ти течат од седење пред компјутер цел ден. Многу повеќе успевам да прочитам со помош на аудио книга. Камо среќа да знаев дека ги имало Стојан Тарапуза и Сказна за детето Вилен во аудио формат, ќе ги слушав 24 часа на ден.
Се регистрирав. Колку ќе ја користам ќе видиме, има добри книги вака набрзина како разгледав ама сега приоритет ми се овие од саемов што ги зедов.