ChatGPT и иднината на вештачката интелигенција

Верувам дека повеќете сте слушнале веќе за chatGPT, едно од најновите достигнувања на вештачката интелигенција што според мене значително се приближува до научно-фантастичните слики за иднината што ги имаме. Се работи за чет создаден од компанијата OpenAI кој се базира на нивните јазични модели, односно начинот на кој ги „вади“ информациите е со помош на машинско учење и многу статистички пресметки.

Може да прави многу работи, а се специјализира што би се рекло во барањата поврзани со пишување и процесирање јазик. Значи, може да напише текст за некоја тема, есеј, e-mail, реклама, слоган, код, а сè тоа да биде уникатно и да не подлегне на плагијаризам. Може да даде идеи и насоки за правење презентации, за говори и сè друго што може да ви текне. Може да сумаризира подолг текст, или глави од книга (под услов да може да ја најде онлајн), може да прераскаже некој текст на поразбирлив начин, или во стил на пират, рапер, Доналд Трамп... Бескрајни можности. Може и да преформулира ваш текст во повисок стил. Имам прочитано дека е одличен во планирање оброци, односно му даваш насоки за тоа што и колку сакаш да внесуваш во текот на неделата, и ти дава рецепти, а состојките може да ти ги сортира според секција во маркет и цена.

Мене лично најмногу ми помага за учење и завршување обврски. Секако не препишувам (не ни можам, немам семинарски и слични текстуални работи ), ама за рисрч помага и тоа како. 90% од времето го користам како glorified google. Верувам дека ми заштедува премногу време бидејќи директно ми дава одговор наместо јас да роварам низ гугл којзнае колку време и на крај пак да не најдам. Исто така кога ќе заглавам на нешто ми дава чекор-по-чекор постапка за одглавување. Некогаш работи, некогаш не. Ама секако е подобро од тоа ич да немам никаква идеја за проблемот. Плус го терам да ми враќа на неформален начин и исто е како да си збориш со другар и заедно да правите работи.

Една од најголемите предности што ги има, кои (барем јас) ги немам забележано во други AI алатки е што „се сеќава“ на претходниот муабет. Значи не го третира promt-от посебно, туку во контекст на другите работи што претходно сте му ги кажале. На тој начин создава персонализирани одговори што навистина дава чувство како да зборувате со вистинска личност.

Е сега, откако го испофалив, редно е и да ги кажам негативните страни зашто ги има, и тоа не малку.

Спојлер

1. Некогаш дава неточни одговори. Ова би било најслабата негова страна. Секако, колку појасен е prompt-от толку помали се шансите ова да се случи, ама некогаш се случува. Што ме води до следната точка:
2. Многу лесно се предомислува. Ако видам дека кажал нешто погрешно и го поправам, се извинува и се поправа. Ова е супер, ама некогаш и јас кажувам нешто погрешно, и се согласува со мене. Не секогаш, ми се случило да ми каже не си во право, вака е стварно, и он да е во право, ама и обратното се има случено. Па тогаш му кажав пак дека не е во право, и пак се согласи и почнавме да се вртиме во круг. Сепак да нагласам, овие две точки повеќе се однесуваат на покомплексни барања и прашања. Секако ако го прашаш нешто факуелно, на пр. „Подреди ги државите според популација“ нема неточен одговор да даде. Исто така, колку поавторитативно го поправиш, толку поголеми се шансите да ти „подлегне“ дури и да не си во право. Затоа прво го прашувам „зошто е ова вака“, па ако земе да објаснува место да се поправи, тогаш јас го поправам.
3. Некогаш буквално си измислува работи. Читав за ова на редит, каде на барање за препорака на книги одговорил со пет книги од кои четири не постоеле. Откако му го кажале тоа се поправил, ама сепак интересен глич е. Истото ми се има случено и мене, кога му побарав листа од онлајн ескејп румс ми даде предлози сосе линкови, а не постојат.
4. Ако сакаш оптимални резултати, треба да следиш специфичен промпт формат. Не знам колку е ова негативна страна отколку едноставно факт кога се работи за која било вештачка интелигенција. Најдобро е промптот да биде во стил „Act as a... I will give you... You will give me...“. И во следниот промпт му даваш задача. Малце е роботски, ама па ако сакаш со робот најубаво да се разбереш, ќе го збориш неговиот јазик.
5. Сè почесто е недостапен. Пред неколку недели си работеше супер, сега откако стана помасивно распространет е многу побавен, постојано има порака горе за тоа дека системот не им скалира добро, а и често не може да се пристапи воопшто до него. Особено во втората половина од денот кога Американците ќе се активираат
6. Најверојатно ќе ја повлечат бесплатната верзија наскоро, или ќе ја „оглупавеат“, што е многу поверојатно.

Малку беше долго ова, ама мислам дека кај нас сè уште не е толку познато ова, а мислам дека секој би имал корист од вакво нешто. Можете да го пробате тука, а ако ви дава порака дека е недостапен рефреширајте неколку пати и треба да ви го даде екранот за логирање на openAI (треба да направите акаунт).

Прашањата ми се, дали сте слушнале за chatGPT, можеби и го користите, ако да, за што и како? Можеби користите некоја друга алатка?
Исто така, многу луѓе сметаат дека сме во време кога започнува револуција во вештачката интелигенција, бидејќи сè повеќе си го наоѓа патот во училиштата, со тоа што децата пишуваат есеи, презентации и други проекти со помош на chatGPT. Не е како концептите зад chatGPT да се нови, ама за првпат работат толку лесно и практично и достапно до нас обичните луѓе. Дали мислите дека ќе се смени цел концепт на образование што досега се сведуваше на меморизирање? Дали треба да се смени? До кој степен?

Лично, мислам дека нема бегање од вештачката интелигенција, ова е само почеток. Видовме и дека постои AI уметност, па и AI музика итн. Не треба да ги избегнуваме овие алатки по секоја цена, ниту пак мислам дека се закана за автентичната човечка креативност. Мислам дека треба да им најдеме место под небото и да научиме да го користиме во наша полза.

 

ChatGPT ме има спасено.

Прво, иако е популарно, јас дознав на предавање на факултет кога учевме за AI и како функционира. Лоша постапка од страна на професорот ако ме мене прашувате.

Сега на факултет имам многу обврски од типот на есеи за кои апсолутно немам време да се замарам покрај учење. Плус, студирам на јазик кој не го знам доволно добро за да брзо и ефективно напишам есеј. Тука ми беше life saver.

Пример, имав да анализирам уметнички дела. Не само што ми помогна да изберам и најдам соодветно уметничко дело, за анализата само напишав „Напиши ми есеј од 200 збора на тој и тој јазик за таа и таа слика“ и ми напиша, онака граматички коректно и соодветно.

Многу the future is here момент и многу се злоупотребува и ќе се злоупотребува. Предвидувам во блиска иднина дека ќе се вметне некаква контрола и ограничување на овие алатки.

 

Da go prasam za lek i resenie dali ke mi kazi

 

Шала на страна, ChatGPT е доста корисна алатка и веќе наоѓа примена во сите IT и Дигитални области. Може многу да помогне, да убрза процес на работа, да биде корисно.

И претходно имаше АИ асистенти кои се користеа за работа, но не беа толку јавни и бесплатно достапни сите.

Во иднина, оној кој ќе научи да ги користи, ќе има многу повеќе бенифити и ќе успее да ја потисне конкуренцијата.

Школскиот систем е веќе застарен и треба да се исфрлат многу работи од него, но исто така и да се задржат. До сега ниту еден курс, академија или било што не може да замени факултет кога е во прашање знаење, логика и кариерен развој.

 

Мене ме интересираат 2 работи:
1. За која цел е јавно и бесплатно достапен
2. Ако е толку добар (појма немам дали е) која е користа, па и потребата од луѓе воопшто? Не стануваме...излишни?

 

Не ми се допаѓаат вакви работи.
Со пишување сами текстови, читање книги, си го збогатуваме речникот, си ја вежбаме креативноста. Ќе отупавиме ако чекаме друг да го прави тоа за нас.

Како средношколка сум викала некогаш што ќе ми е школо, сега кога не сум во школо сфаќам колку е добар концептот на образование и колку работи и вештини сме научиле од таму. Не сакам некаква вештачка интелигенција да ги прави тие работи за мене зошто денес немало да сум ова што сум.

 

Се користи за размножување на лажни академски граѓани (дипломските ќе им ги пишува AI) кои освен да се сликаат за инстаграм и да објавуваат глупости на тик-ток, од други вештини речиси и поим немаат.

 

Точно. Никогаш немало толкав број доктори на наука и толку неписмени луѓе со титули како сега. Доволно се плаќаше друг семинарски и дипломски да пишува, сега и од роботи ќе чекаме.

 

Овака некогаш работеле архитектите без Аутокад. Програмата не ги заменила, туку им помогнала за полесно да се работи. Исто е и со AI-то

Инаку и интернетот е јавно достапен за сите. Ама, да, ќе има платена верзија од ChatGPT по 45$ месечно.
А може бесплатната да се интегрира во БИНГ, затоа што ова AI е на Мајкрософт.

Времињата се менуваат. Со секоја нова промена, стари професии згаснуваат, нови работни места се отвораат. Тој што ќе знае да ги користи овие алатки, ќе успее да се носи со тек на времето, оној што нема да знае како да ги користи, ќе пропадне.

 

Pa nemora za toa AI, neka dojdat vo MK, ajdee akademski turizam. Sakash akademik, nema problem

 

Оф бе Били. Бев жива и свесна особа, и кога се појави интернетот (дајал-ап) и кога се појави веб 2.0. Знаеш која е разликата? Магистерска направив со јавно достапен и бесплатен академски контент на веб 1.0, оти на интернет имаше релевантни работи. Оди најди пристап до истиот академски контент, бесплатно (во секоја смисла) денес.
Е после...како беше она...if you are not paying for the product. ..

Разлика во развојот на интелигенцијата нема. Е нормално, аи има малку повеќе капацитет од мојот мозок, и ќе биде побрз, поефикасен... Ако не, да си го паркирам мозоков негде, пошто веќе е... обсолет? А што да правиме со мозокот на децава?

 

Џабе скокате.
AI-во не е способно да пишува цели семинарски и есеи. Дава само неколку реченици кои можат да му служат на студентот како мала помош.
И студентот сепак мора да гугла дали дадените информации се точни бидејќи AI-во греши.

 

Па најпрво за да истестираат колку го сакаме (очигледно многу, постојано е преоптоварен), да имаат подобра идеја што треба да поправат, а секако и да нè навлечат за после да прежалиме доларчиња за него.

ChatGPT не верувам да почне да заменува професии во блиска иднина, не може да започне проекти од нула, особено такви што не се базираат на текст. Ама концептите зад него сè повеќе ќе се подобруваат, и евентуално ќе стигнеме до точка да се заменат. И не значи дека ќе си ги пуштиме мозоците на пасење туку ќе ги користиме на поинаков начин. Како што копање со мотика е вештина, така е и управување трактор за да се изора нивата. Само што едното е далеку побрзо, полесно и поефикасно.

Сакале ние или не, човештвото како целина се стреми кон олеснување на секоја задача што постои, така што напредок на AI-то и да сакаме не можеме да сопреме. И мене ми е тешко да замислам како ќе изгледа иднината со ова, и секако може да ги восприемам идните генерации како поглупави зашто можеби веќе нема да ги тераат да учат формули напамет, ама па од кај да знам. Се менува парадигмата на светот, ни се менуваат мозоците, и способностите, а и потребите од тие способности.

 

Да не беше твојот мозок немаше да постои ништо од оваа технологија. Не може мозокот да биде обсолет кога кодот сам од нигде никаде не може да се смисли, нели.
Затоа и напредок на технологија воопшто не го изедначувам со некакво оглупавување(ако целиш кон тоа) бидејќи и само како корисници се адаптираме на нешто ново, учиме ново и внесуваме нови концепти. Тоа е спротивно на тупавост.

АИ е иднината и баш сум во ред со тоа. Сега за сега. Зошто да правам нешто на потешкиот начин ако може на полесен? За некои навики сум old fashioned ама ако може компјутерот да ми напише нешто за кое инаку би потрошила три саати, апсолутно ќе го искористам тоа.

 

Интересно е ова. Кои способности се уствари важни способности, и за кого и за што се важни? Или потребни?
Дали зборувањето/ изразувањето (орално, па веројатно и пишано) е важна способност и за кого е важна? Не е реторичко прашање. Дали можеби мисловниот процес се развива токму преку тоа учење формули напамет, јер мозок е мускул, ако не го вежбаш ќе атрофира? Не мора да бидат формули, нека бидат нови јазици, учење песни напамет, што и да е. Не знам, многу ,,Дали,,...

 

Валидни прашања. Не ми е замисливо да може некој што било да работи без тие мозочни врски што се формираат преку учење (и разбирање) на формули, јазици и сè тоа. Ама јас вака рационализирам (како адвокат на ѓаволот против сама себе). Еволуциски најголем дел од мозокот (скоро цел) ни е специјализиран за преживување. Тие ни се најиспраксаните вештини, баш она за што ни е наменет мозокот. Може да кажеме дека учењето формули оди против она за што мозокот ни е создаден. Нашето учење формули е плус. Е сега можеби 200 години од сега нема веќе да правиме место во мозокот за нешто ко формула за плоштина на трапез, туку ќе ги скокнеме тие работи знаејќи дека ќе ни се достапни во секое време, а ,,слободното место" ќе го искористиме за разбирање дрва на одлука, SVN алгоритмот, како работат перцептрони и други класификатори и невронски мрежи... Односно концептите зад AI да ни бидат интуитивни како добар ден, за да можеме полесно да манипулираме со нив.

Постои и можноста за микрочипирање во иднина, и знам дека е stretch, ама ако треба да го замислам човештвото најдалеку што можам во иднината, тоа ми паѓа на памет. Хибрид некаков меѓу човек и робот, или пореалистично кажано, човечкиот мозок набилдан со побрзи и поефикасни алгоритми. Можеби веќе тука избледува нашата дефиниција за ,,развиен" мозок, зашто сепак не е веќе нашиот мозок сам по себе туку потпомогнат. Многу филозофија има во темава, и тешко е да се мисли на тоа. Ама засега мислам, на никој не му штети да може во неколку секунди да си најде препорака за филм со chatGPT.

 

И така, идните генерации нема да знаат да напишат сложена реченица. Како што генерацииве не знаат собирање, одземање и таблица множење.
Секоја алатка која го олеснува животот, го заглупавува човека.

Атрофирани мускули, неправилно држење итн.

Кратење на работни позиции е само капка во морето проблеми.