Вашите баби во младоста

Баба ми по татко , е најстариот член ( 84 години and still counting ) што сеуште е меѓу нас . Тешко живеела од дете до доаѓањето на мајка ми во куќата . Била едно од 6-те деца во семејството ( 8 родени од кои две починале, една сестра на 3 години и една на 17 години , и на двете се сеќава и си ги спомнува на задушници , имаше 3 сестри и двајца браќа ) . Учела многу малку , до 4-то одделение , била слаба ученичка , после татко и ја дал чираче да биде кај поимотни луѓе , кози да чува . Родена е во планинско село во поречието , таму и пораснала . Работела се и сешто , уште од дете . Убава била во младоста , многу луѓе ( од постарите ) ми велат дека наликувам на неа по малку . Дедо ми ( исто 8 деца биле , од кои само двајца браќа починаа пред да наполнат 60 години , 5 браќа и 3 сестри ) , бил учен човек , во тоа време одличен ученик со 5.00 просек , учел до 8-мо одделение ( средно подоцна завршил , тогаш татко му немал пари за да го школува , па дедо ми го пратил чирак со ѕидари во Тетово и Гостивар ) , бил на игранка кај баба ми во село , само што наполнил 18 години , баба ми имала 16 тогаш . Било Ѓурѓовден и се запознале на таа игранка на " сред село " . Но , дедо ми бил повикан на редовно отслужување на воен рок па не се земале веднаш . Тој заминал да отслужи воен рок , а баба ми го чекала додека наполнила 19 години ( дедо ми имал 21 кога го завршил воениот рок ) . Иако многумина сакале да се оженат со неа , таа не сакала и верно си го чекала дедо ми . Татко и не сакал да ја даде за него ( демек многу машки деца се , сиромашни се ) , ама паметница баба ми , се договориле со дедо и заминала бегалка ноќе . Живееле неколку месеци со свекорот и свекрвата , потоа мигрирале во Тетово . Две години живееле под кирија и две со тетка на баба ми додека купиле плац и направиле куќичка со две сопчиња , потоа се родил татко ми .

Дедо ми се дошколувал и го примиле на работа , па зеле кредит и ја срушиле првата куќа , направиле нова , се родил чичко ми , а по неколку години и тетка ми . Живееле во таа куќа околу 10-15 години , па ја срушиле и ја изградиле сегашната куќа , која е доста модерно средена иако е градена пред 40 години . Се намачиле двајцата , но сега на старост баба ми е како царица . Мајка ми и татко ми се грижат за неа , и секогаш вели " сега ми е најубаво , имам од пиле млеко , ех уште здравје да си имав да се порадувам на правнучиња " , јас се шегувам со неа " ајде ќе поживееш ти , ехее од 60 кога наполни вака викаш а како дејка си " . Дедо ми почина во 2011 година , за жал и смртта не му беше баш лесна .. До денес ми е врежана онаа слика кога заплакав бидејќи беше како билка .. А тој , душава си пушти солзи бидејќи ме слушна .. И сам , а и сите ние знаевме дека му се одбројани деновите ..

За баба ми и дедо ми по мајка , друг пат ќе ви кажувам , доста е за денес .