Лак за коса

Здраво на сите, би сакала да ви предложам еден рецепт за домашен лак за коса кој многу лесно може да го направите доколку дома имате одредени состојки. Одлично ја зацврстува косата при разни фризури како и кога правите реп или пунџа и не сакате да ви летаат мали непослушни влакненца. Комплетно без алкохол. Поздрав

Направи сам: природен лак за коса



Лакот за коса е нешто без кое не може да се замисли стајлингот, особено кога станува збор за некој вид на фризура која треба да трае подолго време, или доколку ја собираме косата во пунџа и не сакаме да летаат мали непослушни влакненца на сите страни.

Во продажба се нудат голем број на производи кои ветуваат сјајна и послушна коса и фризура која подолго трае. Сите тие навистина го прават она за кое се наменети, меѓутоа поголемиот дел од нив содржат состојки кои не се баш најпожелни ниту за нас, ниту за околината со оглед на тоа што овој производ е на испрскување и завршува токму во околината.

Секако постојат и природни и органски лакови за коса, меѓутоа скоро сите содржат висок процент на алкохол кој со редовна употреба постепено го суши влакното, а тоа секако не ни е цел.



Затоа во денешнава статија ќе ви предложам еден навистина лесен и природен лак за коса кој одлично го прави своето, а воедно е пријател и на околината која не опкружува. За неговата подготовка ќе ви требаат 10 мин., а ефектот ќе ве остави без зборови.

Состојките кои се потребни за околу 60 мл. лак за коса се:

- 3 супени лажици деминерализирана вода;
- 2 супени лажици ружина вода (доклку немате ставете деминерализирана вода);
- 2 до 3 кафени лажички шеќер;
- 1 кафена лажичка јаболков оцет;
- 1 кафена лажичка алое вера гел
- 2 капки етерично масло (доколку немате не мора)



Во една чашка ставете ги најнапред водата и ружината вода (доколку немате ружина вода во тој случај ставете 5 лажици деминерализирана вода) и додадете го шеќерот. Убаво измешајте додека да се стопи. Потоа додадете го алое вера гелот и јаболковиот оцет и повторно убаво промешајте. На крај додадете една до две капки етерично масло по ваш избор (јас додадов масло од роза). Целта на етеричното масло е да на некој начин го замаскира мирисот на оцетот, да не се чувствува во косата. Ставете ја смесата во едно чисто пластично или стаклено шишенце и вашиот лак за коса е готов.

Зошто токму овие состојки

Алое вера гелот е одличен за косата, ја омекнува и хидрира. Во една книга имам прочитано дека алое вера гелот содржи аминокиселини кои се многу слични на оние присутни во фоликулите на нашата коса, па затоа алое вера гелот има регенерирачко својство и дава голем сјај на косата.



Оцетот има коселкаста ph вредност која е од огромнo значење за убавината и здравјето на нашата коса и дава огромен сјај. Идеалната ph вредност на нашата коса е помеѓу 4 и 5 така да јаболковиот оцет навистина помага во оддржување на истата. Исто така јаболковиот оцет ја затвора кутикулата на влакното и како резултат на тоа косата е сјајна и мазна. Ова е многу важен факт затоа што на тој начин ја задржуваме природната влага во косата, и на некој начин ја спречуваме појавата на расцветани врвови.

Шеќерот во овој рецепт е оној кој го прави всушност зацврстувањето на косата односно ефектот на лак. Јас лично ставив околу две ипол кафени лажички шеќер затоа што според мене цврстината која ја дава на косата е идеална, ни многу јако ни многу меко. Направив обид и со бел и со интегрален шеќер и според мене белиот дава подобар ефект.



Ружината вода ја ставив за да даде убав мирис на производот, но и затоа што ружината вода е одлична за косата, меѓутоа доколку ја немате, секако ставете само деминерализирана вода.

Етеричното масло како што нагласив го маскира мирисот на оцетот и дава фантастичен мирис на косата (како да сте ставиле парфем на вашата коса).

Овој природен домашен лак се користи исто како и купечкиот (оние лакови кои се без гас), односно се испрскува на косата од средна далечина (ни многу блиску ни многу далеку). Ефектот е навистина прекрасен, а мирисот неодолив.





Со оглед на тоа што овој лак е без конзерванси трае две недели, доколку го чувате во фрижидер и до три. Затоа и дозите кои ви ги препорачав се за 60 мл производ. Доколку го користите секојдневно ќе го завршите за три недели, во спротивно може да направите помала доза.

Се надевам дека и оваа статија ви се допадна, а вие доколку се одлучите да го направите, пишете импресии под самата статија.

Поздрав и до следно читање.
Вики

 

Овај,ретко ставам,кога излегувам понекогаш.

 

Има преубав мирис за разлика од Интеса кој го користев предходно. Секогаш користам лак кога ја носам врзана косата за да ги скротам бебешките влакна.

 

Препорачајте некој лак да не остава бели траги како првут ? Скоро од сите досега пробани вечерта се прскам , другиот ден цела коса ми е бела и од сите тафт истиот проблем ми се јавува...

 

На Byphase има лак во вид на спреј е, големо шише е со црвена амбалажа, не остава бели траги

 

Фала многу @Chanell*, ќе го пробам

 

Дали некоја го има користено лакот на Балеа за волумен што е? Дали е траен, дали лепи и дали остава бели траги?

 

Нема лак за коса кој може да ја држи мојава коса..цел ставете го за 10минути пак ке се пушти.Затоа сум цело време со права или прекршена коса.Едино да спијам со смоки/да ги држам над 5 саати па да се навитка колку толку.

 

Нивеа лакот за фарбана коса доколку ви е за замазнување на собрана коса ок е,ама ако е за друго катастрофа.Јас ставам на шишките обично тафт инвизибл користев,ама декљ немаше последниов пат таков викам да сменам.И зажалив.Ја топи косата и како да се туткаат влакненца,па морам да ги расчешлам и сушам одново за да не се познава оти сум ставала.

 

Искуство? На акција е 109ден.

 

Intesa ми е некако стандард за ова, зацврстува и трае, имам пробано и некои други, ама помалку ја држат косата. Ретко користам дома, претежно на фризер кога ми стваат.

 

Здраво на сите! Имам многу проблематична коса која едвај држи локни за жал.. Па препорачајте ми добар лак а воедно да не ја стврднува косата(сум слушнала за такви), без разлика на цена.

 

Досега најубав лак и од Нивеа и било кој друг, јас мразам лакови што лепат, фиксираат, овој не е таков а плус и не ми ја мрси косата, и што ми е исто важно ми мириса на нивеа кремата таа најстарата нивеа од времето кога бев дете
Го земав онака за проба, видов на акција околу 150 ден за проба ама дефинитивно ќе се задржам на него уште долго.

 

Девојки препорачајте ми некој добар лак за коса или некој друг производ по можност од ДМ кој ќе ми ги држи бебешките влакна надолу сплеснати, ептен ми се обновува косата дека доста ми опадна пред некое време од короната цела сум со антени, ставам најбичен лак но пушта после некое време

 

Дали има некој лак за коса кои ја зацврстува косата, меѓутоа да не ја стврднува?

 

Од сите што ги имам користено темно синиот на Нивеа, ми мириса на стандард кремата што е Нивеа онаа плавата во лимена кутија од времето што е. Не лепи, не стврднува а убаво ја држи косата.

 

Од каде можам да купам? Имаш можеби фотографија како изгледа?

 

Taft crniot