Ритуали при миење на вашата коса и грижата за неа после тоа

Скоро во сите статии за грижа на косата пишува дека косата треба да се мие со млака вода, и со масирање на скалпот.

Кога на оваа тема сум зборувала со едната моја фризерка, таа го потврди истото, се додека една жена не ми рече а како ти мислиш да ги отстраниш мртвите клетки од скалпот? со масирање со прстите? ха ха. И јас ја погледнав само и се замислив ...
Тогаш бев помала негде можеби 1 година средно или така нешто.

Сега косата ја мијам така што убаво ја мокрам со млака вода накај топла, и ставам едно кило шампон(наведната ја мијам косата) и тријам со ноктите, тријам, тријам, тријам, буквално корнам, и ја плакнам, не целосно, па повторно со помалку шампон само овој пат го масирам скалпот а не тријам, и кога завршувам со масирање, додека имам пена ја чешлам и убаво ја плакнам додека не почне да свири. И ставам маска, ја чешлам, ја врзувам, и си додека си го мијам телото и сите ритуали проследени со тоа, косата така ми седи, после ја плакнам со млака вода накај топла и ја поминувам со еден скоро ладе туш.

Грижата после тоа:
Ја тапкам со пешкирот да се впие водата, ја прскам со едно од авон за заштита од фенирање(сега ми е потрошено па ќе сменам друго), ја сушам, т.е ги исправувам шишките, а косата не ја сушам целосно, само коренот повеќе и така надоле колку да и дадам форма. И ставам капки од тие од авон, 4 капки ставам, и кога скроз ќе се исуши ја прскам со спреј за освежување или со жолтиот од глис, каков сум купила таков и воала готова сум и можам два дена да си ја мирисам без престан

Мислам интересна ќе биде темава, да си увидиме грешки, да видиме што и како треба или не треба. Јас на пример знам дека не е ич убаво да се чешла косата мокра, и во бањање, ама мене тоа многу убаво ми делува на косата ...
Грешник сум, простете

 

Ритуали при миење на вашата коса,и грижата за неа после тоа

Јас пак прочитав дека доколку се масира скалпот при миење,косата ќе биде подолго чиста и нема да се мрси многу,па и јас првиот пат ставам многу шампон и веднаш плакнам,за разлика од вториот пат ставам малку шампон,го масирам скалпот и на крај го оставам шампонот да делува 2-3 минути.
Плакнам и потоа нанесувам маска,ама јас не ја чешлам косата туку со прсти поминувам низ неа за маската сегде да делува исто Додека си го мијам телото,ставам маска на лице оставам маската на коса да ми поседи и после ја плакнам,ма да тука сум малце сумничава цело време мислам дека имам уште маска на косата и си се замислувам со мрсна коса од недомоиена маска и долго време ја плакнам со силен млаз вода.Исто имам чуено дека ако ја исплакнеш косата со ладна вода на крајот,добро е за зголемување на сјајот (ма да баш не верувам ,ама си го применувам)
После прскам Глис или Лореал спрејче и готова сум
Е,откако ќе ја исфенирам,испеглам и ставам спрејче од авон за сјаен финиш и толку,косата е готова

 

Ритуали при миење на вашата коса,и грижата за неа после тоа

Јас се мијам со млака вода, ни жешка ни ладна.
Порано ставав по двапати шампон, а сеа ме мрзи и неможам само еднаш ставам ќе ја исплакнам и после маска ставам.
Додека ми е мокра прскам од Глис спрејот и после ја сушам,па ја пеглам или ја виткам .

 

Ритуали при миење на вашата коса,и грижата за неа после тоа

Грешка ми е што ја мијам косата со жешка вода, со многу топла вода (море жешка, арно си реков) се капам и таа навика тешко ми е да ја променам.
Инаку масирам нормално со шампонот, не претерано крвнички.
Моментално употребувам шампон против опаѓање и пената ја оставам да отстои 2-3 минути, постапката ја повторувам 2 пати. Потоа излегувам од тушот, ја просушувам со пешкир, се враќам и ставам маска за коса, ја зацврстувам со штипка и оставам да отстои 5-10 минути додека се тинтрам со пилинзи за лице и тело. Сега маската ја расчешлувам после нанесувањето и многу помалку употребувам, порано полна дланка маска ставав на коса и тешко се одмиваше и ми се мрсеше брзо.
Откако ќе завршам, расчешлувам и масирам лосион против опаѓање на скалпот, тоа не се одмива.
Некогаш ставам силиконски капки на врвовите, но почесто заборавам.
Фенирам со четка, па пеглам.

 

Ритуали при миење на вашата коса,и грижата за неа после тоа

И јас ја мијам со жешка вода, ама сега во зима не ни можам поинаку, а не треба, знам.
Користам само шампон и маска, никакви регенератори, балсами и што ти ја знам, а и не го масирам скалпот премногу, што исто е грешка.
После миење, ја оставам отприлика пола саат во пешкир да се подзасуши, во лето сама се суши, во зима со фен. Се трудам да е што подалеку фенот и го уклучувам на најслабо. До пред неколку месеци обавезно следеше пеглање, ама сега откажав тоа, морам малку да ја средам. На крај ставам од Глис масло, а кога ќе помине ден-два, ставам и силиконски капки.
Еднаш неделно ампула и тоа е, не знам ни што повеќе

 

Ритуали при миење на вашата коса,и грижата за неа после тоа

Ја мијам барем двапати со шампон.

Првиот пат додека да ,,фати,, убаво, не се чувствувам измиено само со еднаш. Вториот пат, со тупаници си ја тријам главата, над ушите, на темето, одоздола... Гледав на фризер како ми ја миеја и јас така почнав да ја мијам. Постапката, во зависност од мрсноќа, се повторува.

Потоа, ставам регенератор или маска, што и да користам моментално. Тоа го ставам само на врвовите, затоа што не е баш најпаметно да се шлакнеш со тие така, помрснички продукти, на темето и врз цела коса. Се плакнам ненормално долго, зашто и јас имам фобија дека не ми е доизмиена.

Ја виткам во крпа, ја оставам да си поседи така пола саат, саат, па се расчешлувам. Потоа ја сушам, пеглам, шприцам лак и готова сум.

Еднаш прочитав некаде дека доволно било да го измиеш горниот дел од главата, а надоле не морало да ја миеш косата, сама ќе се измиела. Значи, со вакви глупости, немојте да се ветреете, нит се мие нит се пусти. Пробав и се шетав со мрсна тутка одоздола. Се знае дека мора да се истрие убаво цела глава, косата да биде добро исплакната.

Исто имам читано дека не чинело да се чешлаш веднаш со водена коса, демек се кинело влакното. На сестрата што го напишала тоа, би и порачала да дојде и таа да ме исчешла откако ќе се исушам. Може се кине, не викам не, ама кога ќе фанеш да се отплеткуваш отпосле на коса сушена со фен, претходно неисчешлана... Боже помози!

 

Ритуали при миење на вашата коса,и грижата за неа после тоа

Обично ставам еднаш шампон, затоа што ја мијам секој ден косата и доволно е.
Треба да е навистина гнасна и одвратна, за да мора да ставам шампон двапати.

Нормално си ја масирам, погрубо со нокти, па понежно со врвовите на прстите, оставам да отстои шампонот 2-3 минутки па одмивам.
Ставам маска или регенератор на врвовите, чешлам со крупен чешел со запци и оставам да дејствува.
Ја одмивам со млака вода.

Потоа во пешкир едно 10-15 минути, па ја фенирам, зашто нормално има поубав облик и издржува подолго. На крајот, повторно на врвовите ставам силиконски капки, сосем малку.
Не употребувам повеќе спреј, не ми прави никаква разлика, а не е којзнае колку тешко да си ја расчешлам косата.

Ако мојата напатена коса ја оставам да се исуши природно, нема никаков облик, спласната е, безживотна и многу побрзо ми се мрси.

Е сега... од многуте совети, еден кој го применував и се покажа катастрофално лош, беше оној одмивањето да се заврши со мраз студена вода, за да се затвореле фоликулите или врвовите на влакното и да се спречело од пукање.
Демек почнуваш со топла, завршуваш со ладна вода при одмивањето.
Не.

Косата после еден месец беше ужасна, испукана и играа ножичките.

 

Ритуали при миење на вашата коса,и грижата за неа после тоа

Пред миење ја мачкам со масло,маслиново,чичково,оревово,какво се најде,ма да бадемово и рицинусово убаво втривам и во скалпот.
Одмивам два пати (ако во континуитет ја мијам косата неколку дена,масло ставам на секое второ и само кога имам масло ја мијам два пати,ако не,доволно е и еднаш зошто имам многу сува коса). Ја цедам,ставам регенератор или маска,фаќам со штипка,дур се друго првам. Одмивам,ја упивам водата,ако е денот д за ампула (почнав да ги користам во континуитет веќе 2-3 месеци еднаш неделно и ја сфатив цаката и ја увидов разликата) ја мачкам ампулата,чекам половина час,па шрпицам глис,ако не одма глисот. Најчесто чекам природно да ми се исуши,па пристапувам кон обликување (сега едно ми е хит,ама не кажувам,срам ми е ).Избегнувам фен,пегла дури откако природно ќе се исуши,ама сега и тоа го избегнувам. Моментално ми е шишана така што убаво,природно му доаѓа да има волумен,плус пуцвалка ми е и онака,ако не ја правам со финтава,така што,фенот е само проблем. На врвовите и ставам од кремата на шварцкоф и тоа е тоа.

Ау да и не ја чешлам речиси никогаш. Со прсти ја отплеткувам и не,немам суканици од нечешлано,таква ми е косата,а и не е баш пожелно у неа да заглавам чешел!

 

Ритуали при миење на вашата коса,и грижата за неа после тоа

Прво, ја мијам косата наведната надолу секогаш без исклучок, бидејќи не сакам да ми се слева во меѓуножје нечистотилакот (косата ја рачунам за еден од највалканите делови од човекот, најмногу е изложена на надворешни влијанија и прима секакви мириси и врагови), ни па да ми заглавуваат влакна во меѓуг‘зниот простор (посебно како што ми се големки ). Се извинувам поради непријатности предизвикани од експлицитниот опис.

Ја шампонирам два пати, првиот пат пообилно, вториот пат со доста помалку пена правење. Тријам со нормално масирање на скалпот, инаку нежен скалп имам, не ми поднесува баш секаков шампон. Потоа нанесувам маска за коса, ја собирам со штипка и се капам што значи маската ќе делува некаде 20-тина мин. најмалку до 30 максимум.

Ја плакнам маската со млака вода најпрво со прстите поминувам многу пати низ косата, едно да спречам заплеткување, друго да ги соберам паднатите влакна, кои си ги берам на купче, потоа ги фрлам во корпа за отпадоци, бидејќи купчиња влакна често ги затнуваат одводите во бањите. Ја плакнам долго, исто како Дузи, се ми се чини дека е недомиена, како што ми е ем бујна ем виткана. На крај ја менувам на ладна сосем водата, прочитав посјајно ќе било влакното така. Ама на скалпот кратко само минам со ладната, а на оној дел кој паѓа повеќе т.е. подолго.

Ја мотам во пешкир и ја оставам едно 20-тина мин. ја чешлам уште водена (ако го оставам расчешлувањето за после сушење ќе кршам и заплеткувам после чешли и четки) и ја сушам природно без фен, нанесувам малку пена за сјајна коса и малку масло од лаванда.

 

Ритуали при миење на вашата коса,и грижата за неа после тоа

Прво ставам бадемово масло на врвовите, и чекам да отстои така собрана косата едно саат време, бар толку прочитав овде дека треба да отстои за да впие влакното од маслото.

Потоа ја плакнам косата со топла вода, али не изгор жешка прво зашто ќе се изгорам, а второ не ни чини на влакното толку врела вода, значи тамански, ќе си испробам на кожата. Ставам шампон во раце, па на коса, темелно ја тријам косата, да пушти сапуница шампонот и добро да впие влакното. Отстојува неколку минути па ја плакнам, и уште еднаш ја повторувам истата процедура.

Ставам пешкир на глава, чекам да отстои едно пола саат, после ја тријам малце косата од пешкир, ја чешлам со чешел со подебели запци, еве со ваков:



Jа сушам косата наведната надоле со фен, некогаш со прсти така оставам да се исши, некогаш малце ќе ја исфенирам малце да се потсуши, да не биде скрос водена па ставам од оној Глис регенераторот за сува и оштетена коса, или пак балсамо за сува и оштетна коса од Авон, или пак спрејот. Продолжувам да ја сушам косата со фен. Оставам така, ако излегувам вечерта ја пеглам, ако не за наредното утро за на факс ја пеглам. И тоа е тоа.

Во глобала порано имав доста изгорена коса, и не пазев воопшто на нејзе и не користев никакви препарати. Си ја чукнав главата, да не останам јас без коса како што тргнав, и почнав да ја враќам во живот, ја потшишнувам на неколку месеци кога гледам дека ми е очајна, и нема плачки ко порано: „Лелеее колку ми ја скрати!“. Коса ко коса, расте, и мора да се негува. Сфатив дека подобро е кратка негувана коса, отколку долга крш коса. Епа затоа сум си со средна должина, негде до градите.

 

Ритуали при миење на вашата коса,и грижата за неа после тоа

Обично миењето на мојата коса се одвива во два термини во неделата.

Пред едното миење ставам масло на косата, моментално чичково, а претходно користев рицинусово, и тоа од коренот до врвовите со масажа на скалпот, а после еден час следи теророт: ја мијам со не многу топла вода, ставам грст шампон, моментално од коприва од Илирија со Б-комплекс , ја тријам до лудило, да фати секаде, оставам некои 5 минути да дејствува, ја одмивам, нанесувам шампон за плавуши, Silver Fix, тријам брутално, па ја оставам околу 5 минути додека фрчи бричот.
Ја мијам додека зашкрипи косата, ја цедам и тријам со крпа, па на така фротирана коса ставам маска за коса, односно регенератор, преку едно миење. Расчешлувам со широк чешел за да фати секаде, а да не ја искубам. Третманот со маска/регенератор е лоциран далеку од коренот, а трае колку целото телесно капење.

Секогаш ја мијам наведната надоле заради целосна посветеност.

После миењето ја мотам во крпа, оставам 15-ина минути, прскам Глис за оштетена или ставам силиконски капки на Авон, ја расчешлувам и ја оставам природно да се суши.
Фенот не го милувам, исто така и апаратите и средствата за обликување, освен за свадби и други итни кризни случаи.

 

Ритуали при миење на вашата коса,и грижата за неа после тоа

Ритуалот за миење на моите три влакна од коса започнува со затварање на нос. Користам еден шампон против опаѓање, мирисот не го поднесувам, ама многу ми помогна. Не поднесувам многу жешка вода, па ја мијам со млака, накај ладна и тоа два пати шампонирање, триење на скалпот, а потоа регенератор за врвовите. По плакнењето одма ја расчешлувам и ја мотам во пешкир. По едно 15 минути пак ја расчешлувам и ја сушам 2 минути со главата надоле, а потоа ја фенирам и душата ми излегува додека да ја истегнам убаво за да добијам мааалце волумен. Дека ми е ретка, одма ми се сплескува, ја фенирам со голема четка и на крај им ставам малце лак на шишките за да се направат тетратка.
На врвовите ми е многу сува и ми цвета. Порано и ставав разни чуда, спрејови, селиконски капки, ама сфатив дека за тоа лек се само ножиците. Сега почесто ја шишам и поубаво и поздраво изгледа.

 

Ритуали при миење на вашата коса,и грижата за неа после тоа

Се маслосувам во главата со бадемово, маслиново, рицинусово, ореово, шо год имам. Седам така колку што може подолго, ако имам време и со саати. Колку подолго оставам, поубава е косата. Прво го измивам маслото со млака вода, никогаш не мијам со жешка пошто истото го прави што и фенот. Па еден шампон, масирање со прстите, и многу малку со нокти, најнежно на свет, нема шанса теоретска да трљам нити гребам. Плакнам, маска Глис на врвовите, 5-10 минути, мијам скрос све.

Сушам со гужвање во пешкир, силиконски капки на врвовите и на полусува коса спреј Глис. Ни фен ни пегла. И откако почнав да го правам сево ова имам сто пати поубава и поквалитетна коса.

Никогаш не мијам секој ден, на 3-4.

 

Ритуали при миење на вашата коса,и грижата за неа после тоа

Сега ме замисливте искрено.
Ќе пробам да ставам регенератор или маска на малку засушена коса, па после да ја измијам пак, живо ме интересира ќе ми направи ли разлика.

Инаку, една од најважните одлуки врзани за грижата на коса ја донесов пред некој ден, се вика - фарби без амонијак.
Па ќе видиме колку ќе се држам до одлукава.

 

Ритуали при миење на вашата коса,и грижата за неа после тоа

Kако прво и за мене најважно е дека не ја мијам косата секој ден,т.е едно време секој ден почнав и мене почна да ми се разлетува и на метла да личи,така да фризерката ми кажа да не ја мијам секој ден,било здраво и убаво да се измрси косата

Jа мијам на секој 2-3 ден,си ставам секогаш по два пати од шампонот моментално го имам Dove и сум презадоволна од цената и квалитетот,потоа маска,и на крај се мијам целата со преладна вода,т.е јас и скоро никогаш не се мијам со топла потоа ја протресувам со крпата така водата да ми ја собере прскам спреј за против оштетување,горење и потоа додавам морокан оил,крема или силиконски и ја сушам,скоро секогаш ја сушам,ако не ја исушам за никаде ми е,а порано природно си ја оставав и ми беше препреубава

A да и јас никогаш не ја чешлам косата,не знам понеубава ми е така,си поминувам низ неа со прстите и така,а за пеглање еднаш месечно ако ја испеглам толку само.

Kе ги ставам производите во спојлер,презадоволна сум од нив и ми е мерак да ги споделам со вас

Спојлер

 

Ритуали при миење на вашата коса,и грижата за неа после тоа

Епа вака... Кога имам време, обавезно 2-3 часа пред миење ставам рицинусово заедно со маслиново масло, а понекогаш само пиво. Користам шампон од Орзен за сува коса и го нанесувам двапати (се трудам што повеќе да го масирам скалпот), потоа ставам маска исто Орзен за сува коса и гледам последното миење да ми е со поладна вода. Кога ке излезам, ја чешлам со чешел со широки запци и ја оставам сама да се просуши. Потоа ставам од глис спрејот и капки за коса со суви краеви .

 

Ритуали при миење на вашата коса,и грижата за неа после тоа

Мене ме замисливте за чешлањето.
И јас имам виткана коса и пргава, и со чешлањето во миење си мислам дека се прави поубава поволуминозна ...
Порано не ја чешлав ич никогаш, ама тогаш ми беше долга косата, а сега ми е средна.
Хм, нареден пут пошто денес штетата е направена нема да ја исчешлам.

И ќе си купам и чичково и бадемово масло, а не само ја шлапам со рицинусово и маслиново.

 

Ритуали при миење на вашата коса,и грижата за неа после тоа

Женича бре што не ќе направиме и пак ќе се замислиме ДАЛИ и тоа е доволно.
Ритуалот ми е сличен како на сите вам скоро...значи шампонирам два пати па маска ставам (еднаш неделно не сакам два пати оти повеќе ќе ми се мрси коренот )и ја оставам додека си ги правам другите тракатланциии на крај ја мијам маската ...гледам да избегнувам фенови што можи повеќе ама сепак колку и да ставаме маски капки силиконски спрејови и. т .н едно е јасно
РЕДОВНО ПОТСТРИЖУВАЊЕ е најдобриот лек.
Кога ќе ми текни што сум се ставала порано ми иди да прснам од смеа јајце ставав ,јаболки варени млеко итн итн итн ....кога ќе се здрвеше тоа јајцето шо ти цимент оди изми го трпи бабе за УБАВИНА само стрижење редовно никоја друга превентива не е толку добра .

 

Ритуали при миење на вашата коса,и грижата за неа после тоа

Хехех јас пак ништо не и правам. Ја мијам на секој втори ден и шампон ставам само по еднаш. Го масирам скалпот и тријам со ноктите, ја исплакнувам и ја замотувам во крпа. Така ќе си поседам колку ми е ќеф, ќе ја исчешлам и ќе ја исфенирам. Ја кратам два пати во годината и тоа.
Едно време и ставав ампули ама ништо фајде од тоа.
Маски, масла никогаш немам ставано.
Капки едно време користев ама и така ми се мрси па и капки плус и ставав.
Сега ништо. Миј носи.

 

Ритуали при миење на вашата коса,и грижата за неа после тоа

Мијам еднаш со Дизни шампон, после уште еднаш со Афродита шампон од Лотос као демек, плакнам, у турбан ја ставам 20 минути, пуштам фен и успат чешлам и ајт... не ми се оштетува ич... битно ми е да не сум мрсна наредниот ден.