8050 денари – конечно утврдена минималната плата

8050 денари – конечно утврдена минималната плата

Минималната плата во Република Македонија ќе изнесува 8.050 денари во нето или 12.265 денари во бруто износ, се договорија денеска трите социјални партнери - Владата, работодавачите и синдикатите.
Утврденото ниво на минимална плата се однесува на основната плата за полно работно време и нормален учинок, односно во износот не се вклучени додатоците на плата, кои доколку постои основ за исплата, се додаваат на утврдениот износ. Доколку вработениот не ги остварува очекуваните резултати, минималната плата се намалува соодветно на сработеното.

„За првпат во историјата на независна Македонија, после 20 години преговори на различни гарнитури - политички, економски и синдикални, постигнат е договор за утврдување на минимална плата. Даденото ветување се исполни“, рече премиерот Никола Груевски на прес-конференција по завршувањето на седницата на Економско-социјалниот совет.
Тој истакна дека со овој договор ќе се подобри состојбата на 65 илјади работници чија плата во моментот е под предложеното ниво. Најави донесување на закон за минимална плата до крајот на годината, кој ќе почне да се применува од 2012 година.

„Процесот опфаќа усогласување со предвиденото решение на дел од претпријатијата, односно работодавачите ќе треба да ги усогласат платите на околу 65 илјади лица на кои се исплатува плата под предложеното ниво, меѓу кои најголемиот дел кои работат во секторите текстил, производство на кожа и на облека. Поради тоа ќе се обезбеди период на усогласување од три години во кој ќе се достигне предложениот износ на минимална плата“, подвлече премиерот Груевски.
Работодавачите и синдикатите изразија задоволство што за првпат се утврдува минимална плата во државата со која ќе се обезбеди пред се материјална сигурност за работниците.

 

Синдикалците сами си пресметаа дека потрошувачката кошничка за едно четиричлено семејство би чинела 30.000 денари а сега се согласни за минимум 8.000ден. (Оние синдикалци кои ги бранат интересите на работникот и кои костумисани и горди си шеткаат и седат по владини канцеларии)
Ова нема да смени ништо, но барем ќе е добро за оние во текстилната и кожарската индустрија чија плата е и по 5.000. А да не се заборави фактот дека на ваквата минимална плата имаат право само оние со полно работно време и оние кои се осигурени.

 

Потполно се согласувам. Ова е добра работа....меѓутоа знаејќи си го нашиот менталитет и ситуацијата во која сме и познавајчи го минатото и јас мислам дека ќе има бран отпуштања и дека како по обичај и ова ќе биде уште едно фијаско не на оваа власт него општо на власта во Македонија оти нели секоја власт што сме ја имале има утка до утка......само што овие малце шминкаат а многу уткаат а другиве барем не шминкаа ( реклами, спотови - перење мозок ) и така натака.
А законов е сосема во ред и го поддржувам ама да е како што треба без мајмунлаци кои допрва ќе следат.

 

Чисто се сомневам дека работодавачите ќе ги зголемат платите во гранките каде до вчера било дозволено и со пропис да се исплаќаат плати од по 5.000 ден. Веројатно ќе ги осигураат работниците на половина или скратено работно време, бидејќи 8.050 ден. е минимална плата за полно работно време, вака 4.025 ден. ќе одат регуларно на трансакционата сметка, а остатокот до 5.000 или 6.000 ден. ќе се исплатува на диво како што и досега во скоро секое приватно претпријатие имаше дел од плата кој се подигаше во банка, а дел во плико(заради намалување на обврските за персонален данок и придонеси и со тоа избегнување на плаќање кон државата која пак свесно подзамижуваше) и ова беше на големо позната јавна тајна, бидејќи и досега голем број работници беа осигурени или на скратено работно време или на најминималниот минималец предвиден на ниво на таа гранка. Голем дел од луѓето среќни што воопшто земаат плата и не ги интересираше зошто е тоа вака да бидеме искрени, зошто има цепкање во исплатата на нето платата. Ако почне со примена мојава претпоставка тоа значи верижно помалку средства во ПИОМ, а потешкотиите за исплата на пензиите ќе се крпарат пак со нови задолжувања и долгорочно пак ни се пишува црно во поглед на презадолжување, ама Македончето е навикнато на црнила и на заобиколување и работење на црно. Само што ова не е Холивуд и не е Вил Смит со фенси одело и цвиќера во главна улога и не е воопшто кул. Напротив, трагично е потрагично и од трагедиите на античките мајстори на трагедијата од нашиот јужен сосед.

 

Браво бе. Мизерно е да се утврди минималнава плата на оваа смешна сума. Мислам дека со овие паричиња (кои нели, нема да ги добијат пак целосно), со извинење, ама таман ќе им стаса да си купат тоалетна хартија и да си го избришат газот.

Еве двајца, ако земаат, во ,,нормални,, околности, 8050 денари, значи месечно имаат 16 100 денари на располагање. Ако живеат во Скопје, овие пари ни за тојлет пејпер не им стасуваат. За јадење на вчерашен леб, да, таман. Под услов да го јадат само лебот. Да додадеме едно дете, ако диши по една молекула кислород дневно и јаде по три ронки леб, мислам дека имаат шанса дури и да заштедат нешто. Каде се тука парите кои СЕКОЈ ама буквално СЕКОЈ ги заслужува - средства за хигиена, алишта, излегување, одмор, релаксација,... ?! Изгубени во свемирот, афкорс. И како тие луѓе да раѓаат, школуваат деца, градат куќи/купуваат станови, возат автомобил, одат на одмори ?? Па тоа е бре нормален живот, не вегетирање на воздух и вода.

Не викам дека 8 илјадарки се полоши од 5, но, ова е мизерно. Баш, баш мизерно. Почнувам да се прашувам што не е, уствари. Јас месечно трошам повеќе за живеење во Скопје, а тек па да треба фамилија да гледам со овие пари.

 

Да видам- да не верувам, да им дадат повеќе од 6000 денари на жените кои што работат во фабриките за текстил .
Минимална плата 8050 денари, што ќе направиш со волку пари во текот на месецот?! Ќе си ги платиш само сметките и даноците. На млад човек не му стигнуваат париве за месец дена, а не па на некој кој треба да издржува цело семејство.
Разочарана сум од износот на минималната плата. Во време кога цената на нафтата е на високо ниво и се поскапува, тие даваат минимална плата со 4 цифри

 

Дека е мала сумата ќе се сложам ...
Со овие пари тешко дека некој може да излезе на крај . Ама после 20 години да се конечно утврди минимална плата каква таква . Зошто имам слушнато дека има луѓе и што работат во конфекции и земаа по мизерни 4000 денари еееј не знам што луѓе ќе беа работодавачите легално ропство .

Можеби нема да огрее сонце ама барем чекор напред . Да се надеваме на евентуално понатамошно покачување и делување .
А дали ќе се почитува зависи од инспекцииве .

 

Беше предобро за да биде вистинито...

ЌЕ СЕ ИЗНАЧЕКААТ РАБОТНИЦИТЕ ЗА МИНИМАЛНАТА ПЛАТА

Десетици илјади работници ќе чекаат три години за да го достигнат утврденото ниво на минимална плата од 8.050 денари. Причината е што токму компаниите од секторите текстил и кожа, во кои има најниски просечни...

Текстилните работници ќе ја чекаат Нова 2015 година
Десетици илјади работници ќе чекаат три години за да го достигнат утврденото ниво на минимална плата од 8.050 денари. Причината е што токму компаниите од секторите текстил и кожа, во кои има најниски просечни плати, ќе добијат можност оваа сума да ја достигнат до први јануари 2015 година. Според синдикалните организации, во моментов над 65.000 работници во земјава земаат плата помала од 8.050 денари. Велат дека немаат податоци колку од овие луѓе работат во текстилната и кожарската индустрија. Според експертот по трудово право, Драге Јовановски, ова е катастрофална одлука со која практично ќе се легализираат ниските плати во овие сектори.

- Ако сакаа да биде коректно, требаше да донесат одлука од 2012 година минималната плата во овие сектори да биде да речеме 7.000 денари, па во 2013 година 7.500 денари и веќе во 2014 над 8.000 денари. Вака ова што се донесе не значи ништо, вели Јовановски.

Според најавите, со законот за минимална плата ќе се утврди по колку проценти ќе треба да се зголемува платата на работниците секоја година за во 2015 година да го достигне нивото на утврдената минимална плата. Од Конфедерацијата на слободни синдикати со став дека најважно е што концептот за минимална плата ќе почне да се применува од почетокот на идната година. Велат, добро е сме што сумата од 8.050 денари нема да биде фиксна туку нивото на минималната плата ќе се пресметува како процент од просечната плата во државата.

- Јас не би сакал да говорам за бројката од 8.050 денари туку на процентот од 39,59 отсто од просечната плата, кој беше утврден. Тој ќе биде вметнат во законот, а не сумата од 8.050 денари. Веќе наредниот месец пио стапувањето на законот минималната плата може ќе биде 8.100 денари, изјави Раско Мишковски, претседател на КСС.

Минималната плата се утврди во договор помеѓу Владата, синдикатите и работодавачите. Износот од 8.050 денари се однесува на основната плата за полно работно време и нормален учинок на работното место.

 

Се скинаа со цифрава. Па не 8000...туку 8050! Иии 50! Цели два леба!
Нека живеат тие со толку бе. Нека хранат, облечат и школуваат четиричлено семејство со 16100 ден (ако се луѓето среќни и двајцата да имаат работа), нека платат сметки и нека им остане и за “црне дане“ од истите. Сигурно. Тие за една масажа плаќаат толку.
Сиротиве “текстилци“ утре сабајле ке добијаат “толкава“ плата...среќни ке се тие и од 4000 на 5000 да им качат.
Многу красно се замачкаа очите на народот и се даде лажна надеж.
Дај Боже да се оствари нешто, ама еве, веќе почнаа да си наоѓаат зарзавати во одлука која самите ја донеле. Трагикомедија.

 

Трагично е што синдикатот се радува на оваа сума.
Туку да де,на праг од нова светска депресија...да опростиме велите?!

 

Дали работава е за плачење или за смеење??
Ај, конечно се утврди, леле колку време требаше, да се чуди човек!
Ама од друга страна, што се па 8050ден.???

И ова ќе се заобиколува:
- ќе земат работниците цела плата, а потоа дел ќе му ја вратат на рака на газдата
- има и ќе има непријавени работници кои земаат далеку испод минималната плата
- осигурани работници на скратено работно време и земаат толкава плата, а работаат по 8 часа или повеќе
- отпуштања мислам нема да има, зашто потребни се работници, а газдите сепак имаат пари
-итн.

Само не знам што работа имаат овие синдикативе бе? Срамота е да се нарекуваат синдикати! Зошто се` се, само на синдикати не личат!

 

јас одамна престанав да бидам дел од синдикатот оти гледав дека ништо не прави а јас 150 денари му давав месечно од мојата плата!Си реков крај на хохштаплерите кои зимаат немачена пара. А за сумава за најниска плата тоа е мизерно оти со тие не се поминува месецот, сега кога ќе фати студот и со други редовни трошоци вода, струја итн ќе одат 5000 ден зихер, ами камо за храна?Па уште се напишале во весник ветивме -остваривме, СРАМОТА

 

добро и што попрво со оваа сума? Мислам добро би било некој од врвот за проба нека живее еден месец со минимална плата за да увиди дали е нормално и да видам колку ќе преживее!

 

Или ќе летаат луѓе од работа, или работниците од банка ќе подигаат по 8000 денари плата, па ќе му враќаат на газдата на рака. Тоа е...

 

Малку е.... многу малку! а и сигурно ќе има многу отпуштања...зашто прво 2 години ова ќе биде пробно,со цел фирмите и менаџерите да се навикнат на покачувањето.

 

и мајка ми и татко ми зимаат околу 15000 вкупно двајцата, самата знам колку е тешко да се сврзи крај со крај во денешно време, многу пати и се чувствувам глупаво бидејки неможам да носам најк и пума како сите мои врснички а толкава реклама за ова гледам на телевизија што ни самата незнам којзнае што се случило, срам за државата

 

па синдикатот е крив за оваа работа страмота бе пред изборите кажуваа едно сега друго нели минимална плата ќе бараа да биде 9700денари на што личи ова?а кога беше во прашање просветата очите ќе си ги извадеа малку му била плата работа (нишај врата земај плата-тупаци)па и гледам колку спремни ученици имат и на што ги научиле
Страмота овие пари се само за месечните сметки незнам како замислуваат луѓето да живеат со оваа плата...